തിരുവനന്തപുരം: കഴിഞ്ഞ ഒരു മാസത്തിനിടെ നടത്തിയ പരിശോധനകളിൽ സംസ്ഥാനത്ത് 17,000 ലിറ്ററോളം വ്യാജ വെളിച്ചെണ്ണ പിടിച്ചെടുത്തതായി ആരോഗ്യ വകുപ്പ് മന്ത്രി വീണാ ജോർജ് അറിയിച്ചു. 1014 വെളിച്ചെണ്ണ പരിശോധനകളാണ് ഈ കാലയളവിൽ നടത്തിയത്. ഇതിൽ, 469 സാമ്പിളുകൾ ശേഖരിക്കുകയും, 25 സ്ഥാപനങ്ങൾക്ക് നോട്ടീസ് നൽകുകയും ചെയ്തു. 'കേരസൂര്യ', 'കേര ഹരിതം', 'കുട്ടനാടൻ കേര' തുടങ്ങിയ പേരുകളിൽ വ്യാജ വെളിച്ചെണ്ണ നിർമ്മിച്ചവർക്കെതിരെ നിയമനടപടികൾ സ്വീകരിച്ചതായും മന്ത്രി വ്യക്തമാക്കി.

ഏപ്രിൽ മുതൽ ഇതുവരെ 21,030 ഭക്ഷ്യ സുരക്ഷാ പരിശോധനകൾ നടത്തിയതിൽ 331 സ്ഥാപനങ്ങൾക്കെതിരെ കേസ് ഫയൽ ചെയ്യുകയും, 1613 സ്ഥാപനങ്ങളിൽ നിന്ന് 63 ലക്ഷം രൂപ പിഴ ഈടാക്കുകയും ചെയ്തു. വരും ദിവസങ്ങളിലും പരിശോധനകൾ തുടരുമെന്നും മന്ത്രി വ്യക്തമാക്കി.

ഓണക്കാലത്തെ പരിശോധനകൾ കർശനമാക്കുന്നു

ഓണത്തോടനുബന്ധിച്ച് വിപണിയിലെ ഭക്ഷ്യവസ്തുക്കളുടെ ഗുണനിലവാരം ഉറപ്പുവരുത്തുന്നതിനായി ഭക്ഷ്യസുരക്ഷാ വകുപ്പ് സംസ്ഥാന വ്യാപകമായി പരിശോധനകൾ ശക്തിപ്പെടുത്തും. അടുത്ത ആഴ്ച മുതൽ എല്ലാ ജില്ലകളിലും പ്രത്യേക സ്ക്വാഡുകൾ രൂപീകരിച്ച് രാത്രികാലങ്ങളിലും പരിശോധന നടത്താൻ മന്ത്രി നിർദേശം നൽകി.

പ്രധാനമായും മാർക്കറ്റുകൾ, ഹോട്ടലുകൾ, വഴിയോര ഭക്ഷണശാലകൾ, ബേക്കിംഗ് യൂണിറ്റുകൾ, കാറ്ററിംഗ് യൂണിറ്റുകൾ എന്നിവിടങ്ങളിലാണ് പരിശോധന നടത്തുക. ഭക്ഷ്യ എണ്ണകൾ, നെയ്യ്, ശർക്കര, പാൽ, പായസ മിശ്രിതങ്ങൾ, ധാന്യങ്ങൾ, പഴങ്ങൾ, പച്ചക്കറികൾ, ചിപ്സ് എന്നിവയുടെ ഗുണനിലവാരം ഉറപ്പാക്കും.

പ്രധാന നിർദ്ദേശങ്ങൾ:

ഒരു സ്ഥാപനവും ഭക്ഷ്യസുരക്ഷാ ലൈസൻസ് ഇല്ലാതെ പ്രവർത്തിക്കാൻ പാടില്ല.

ഭക്ഷണത്തിൽ മായം ചേർക്കുന്നത് ക്രിമിനൽ കുറ്റമാണ്.

ജീവനക്കാർക്ക് ഹെൽത്ത് കാർഡ് നിർബന്ധമാണ്.

പാക്കറ്റിലുള്ള ഭക്ഷ്യവസ്തുക്കൾ വാങ്ങുമ്പോൾ നിർമ്മാണ-അവസാന തീയതികൾ ശ്രദ്ധിക്കുക.

പരാതികൾ അറിയിക്കാൻ 1800 425 1125 എന്ന ടോൾ ഫ്രീ നമ്പർ ഉപയോഗിക്കാം.