നടനും സുഹൃത്തുമായ മമ്മൂട്ടി(Mammootty) പൂർണ ആരോഗ്യവാനായി തിരിച്ച് വന്നതിൻ്റെ സന്തോഷം പങ്കുവെച്ച് നടനും എഴുത്തുകാരനുമായ വി.കെ. ശ്രീരാമൻ(VK Sreeraman) സോഷ്യൽ മീഡിയയിൽ പങ്കുവെച്ച കുറിപ്പ് ആരാധകർ ഏറ്റെടുത്തു. ആരോഗ്യപരമായ ബുദ്ധിമുട്ടുകൾക്ക് ശേഷം പൂർണ ആരോഗ്യത്തോടെയുള്ള മമ്മൂട്ടിയുടെ തിരിച്ചുവരവിലുള്ള സന്തോഷം പങ്കുവെച്ചുകൊണ്ടാണ് ഈ കുറിപ്പ്. മമ്മൂട്ടിയുമായി നടത്തിയ ഫോൺ സംഭാഷണത്തിൻ്റെ ഹൃദയസ്പർശിയായ ഭാ​ഗങ്ങളും അദ്ദേഹം പങ്കുവെച്ചിട്ടുണ്ട്.

മമ്മൂട്ടിക്കൊപ്പമുള്ള പഴയകാല ചിത്രവും ഓട്ടോറിക്ഷയിൽ നിന്നുള്ള മറ്റൊരു ചിത്രവും ചേർത്താണ് വി.കെ. ശ്രീരാമൻ കുറിപ്പ് ആരാധകർക്കായി പങ്കുവെച്ചത്. ഒരുപാട് കാലത്തെ സൗഹൃദത്തിൻ്റെ ആഴം വ്യക്തമാക്കുന്ന ഈ കുറിപ്പ് സിനിമാ ലോകത്തും ആരാധകർക്കിടയിലും വലിയ ചർച്ചയായി മാറിയിരിക്കുകയാണ്

വി.കെ ശ്രീരാമൻ പങ്കുവെച്ച കുറിപ്പ്

നിന്നെ ഞാൻ കൊറേ നേരായീലോ വിളിക്കണ് ? നീ വളരെ ബിസി ആണ് ആണ് ലേ?
"ബിസിആയിട്ട് പൊക്കോണ്ടിരിയ്ക്കായിരുന്നു ഓട്ട്രഷേല് .ഇതിൻ്റെ സൗണ്ട് കാരണം ഫോണടിച്ചത് അറിഞ്ഞില്ല. "
കാറോ ?
"ഡ്രൈവൻ വീട്ടിപ്പോയി. ഇന്ദുചൂഡൻ് സ് പ്രദർദശനത്തിന് വന്നതാ. അത് കഴിഞ്ഞ് , അമൃതേം കഴിഞ്ഞേ ചെറുവത്താനിക്ക് പോവാമ്പറ്റു.
അപ്പ അവൻ പോയി..''
ഡാ ഞാൻ വിളിച്ചതെന്തിനാന്ന് ചോദിക്ക്.. .നീ
" എന്തിനാ?"
അവസാനത്തെ ടെസ്റ്റും പാസ്സായട
"ദാപ്പോവല്യേ കാര്യം ?ങ്ങള് പാസ്സാവുംന്ന് എനിക്ക് നേരത്തെ അറിയാമായിരുന്നു. "
നീയ്യാര് പടച്ചോനോ?
"ഞാൻ കാലത്തിനു മുമ്പേ നടക്കുന്നവൻ. ഇരുളിലും വെളിച്ചത്തിലും മഴയിലും വെയിലിലും വടിയോ കുടയോ ഇല്ലാതെ സഞ്ചരിക്കുന്നവൻ"
………..
"എന്താ മിണ്ടാത്ത്. ?
ഏതു നേരത്താ നിന്നെ വിളിക്കാൻ തോന്നിയത് എന്ന് ചിന്തിക്കുകയായിരുന്നു ഞാൻ.
യാ ഫത്താഹ്
സർവ്വ ശക്തനായ തമ്പുരാനേ
കാത്തു കൊള്ളണേ !

അതേസമയം പൂർണ ആരോഗ്യത്തോടെ മടങ്ങിയെത്തുന്ന നടൻ മമ്മൂട്ടിക്ക് ആഘോഷവരവേൽപ്പ് നൽകുകയാണ് മലയാള സിനിമാ ലോകം. നടൻ മോഹൻലാൽ മമ്മൂട്ടിയെ ചുംബിക്കുന്ന ചിത്രമാണ് സോഷ്യൽ മീഡിയയിൽ പങ്കുവെച്ചത്. . പ്രമുഖ സംവിധായകൻ സിബി മലയിലിന്റെ കുറിപ്പും ഇതിൽ ശ്രദ്ധ നേടി.

"കേൾക്കാനായി കാതോർത്ത് പ്രാർത്ഥനയോടെ കാത്തിരുന്ന സന്തോഷവാർത്ത," എന്നാണ് സിബി മലയിൽ തന്റെ ഔദ്യോഗിക സോഷ്യൽ മീഡിയ പേജിൽ കുറിച്ചത്. മമ്മൂട്ടിയുടെ ആരോഗ്യപരമായ ബുദ്ധിമുട്ടുകൾക്ക് ശേഷം പൂർണ ആരോഗ്യത്തോടെയുള്ള തിരിച്ചുവരവിൽ ആത്മാർത്ഥമായ സന്തോഷം പങ്കുവെക്കുന്ന ഈ വാക്കുകൾ ആരാധകർ ഏറ്റെടുത്തു.