പാക്കിസ്ഥാനിൽ മിന്നൽ പ്രളയത്തിൽ മരണസംഖ്യ ഉയരുന്നു. കഴിഞ്ഞ 48 മണിക്കൂറിനുള്ളിൽ 321 പേർ മരിച്ചതായി രാജ്യത്തെ ദുരന്തനിവാരണ അതോറിറ്റി അറിയിച്ചു. 21 പേർക്ക് പരിക്കേറ്റു. ഖൈബർ പഖ്തുൻഖ്വ പ്രവിശ്യയിലാണ് എറ്റവും കൂടുതൽ മരണങ്ങൾ രേഖപ്പെടുത്തിയത്.

ഇവിടെ മാത്രം 307 മരണങ്ങൾ റിപ്പോർട്ട് ചെയ്തു. പാക് അധീന കശ്മീരിൽ ഒമ്പത് പേരും വടക്കൻ ഗിൽഗിത്-ബാൾട്ടിസ്ഥാൻ മേഖലയിൽ അഞ്ച് പേരുമാണ് മരിച്ചത്. കനത്ത മഴയെ തുടർന്നുണ്ടായ വെള്ളപ്പൊക്കവും വീടുകൾ തകർന്നുമാണ് കൂടുതൽ മരണങ്ങൾ.

അതേസമയം പാക്കിസ്ഥാന്റെ വടക്കു പടിഞ്ഞാറൻ മേഖലയിൽ അടുത്ത മണിക്കൂറുകളിൽ കനത്ത മഴ സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്ന് കാലാവസ്ഥാ വകുപ്പ് മുന്നറിയിപ്പ് നൽകി. ബുണർ, ബജൗർ, സ്വാത്, ഷാംഗ്ല, മൻസെഹ്‌റ, ബട്ടാഗ്രാം എന്നീ പർവതപ്രദേശങ്ങളിലാണ് പ്രളയം ഗുരുതരമായി ബാധിച്ചത്. ഈ പ്രദേശങ്ങളെ സർക്കാർ ദുരന്തബാധിത പ്രദേശങ്ങളായി പ്രഖ്യാപിച്ചു.

കനത്ത മഴയിലും മണ്ണിടിച്ചിലിലും മിക്ക പ്രദേശങ്ങളിലേക്കും എത്താനുള്ള റോഡുകൾ തകർത്തു. ഇത് അവിടങ്ങളിലേക്ക് സഹായം എത്തിക്കുന്നതിന് വെല്ലുവിളി സൃഷ്ടിക്കുന്നു. പലയിടത്തും കാൽനടയായി എത്തിയാണ് സഹായങ്ങൾ എത്തിക്കുന്നത്.