ന്യൂഡൽഹി: രാജ്യം 79ാംമത് സ്വാതന്ത്ര്യദിനം ആഘോഷിക്കുമ്പോൾ ആശംസകളുമായി പ്രധാനമന്ത്രി നരേന്ദ്രമോദി. നമ്മുടെ സ്വാതന്ത്ര്യ സമര സേനാനികളുടെ സ്വപ്നങ്ങൾ സാക്ഷാത്കരിക്കുന്നതിനും ഒരു വിക്ഷിത ഭാരതം കെട്ടിപ്പടുക്കുന്നതിനും കൂടുതൽ കഠിനാധ്വാനം ചെയ്യാൻ ഈ ദിനം നമ്മെ പ്രചോദിപ്പിക്കട്ടെയെന്ന് പ്രധാനമന്ത്രി എക്സിൽ കുറിച്ചു. മോദി രാജ്ഘട്ടിലെത്തി. ശേഷം ചെങ്കോട്ടയിലാണ് ദേശീയ പതാക ഉയര്‍ത്തുക.

"എല്ലാവർക്കും വളരെ സന്തോഷകരമായ സ്വാതന്ത്ര്യദിനാശംസകൾ നേരുന്നു. നമ്മുടെ സ്വാതന്ത്ര്യ സമര സേനാനികളുടെ സ്വപ്നങ്ങൾ സാക്ഷാത്കരിക്കുന്നതിനും ഒരു വിക്ഷിത ഭാരതം കെട്ടിപ്പടുക്കുന്നതിനും കൂടുതൽ കഠിനാധ്വാനം ചെയ്യാൻ ഈ ദിവസം നമ്മെ പ്രചോദിപ്പിക്കട്ടെ. ജയ് ഹിന്ദ്!" പ്രധാനമന്ത്രി നരേന്ദ്ര മോദി തന്റെ എക്സ് ഹാൻഡിൽ വഴി ആശംസകൾ നേർന്നു.

1947-ൽ അവസാനിച്ച 200 വർഷത്തിലേറെ നീണ്ടു നിന്ന ബ്രിട്ടീഷ് കൊളോണിയൽ ഭരണത്തിൽ നിന്ന് രാഷ്ട്രം മോചിതമായതിന്റെ ഓർമ്മയ്ക്കായാണ് ഈ ദിനം രാജ്യം ആചരിക്കുന്നത്. ഈ വർഷത്തെ സ്വാതന്ത്ര്യദിനാഘോഷത്തിന്റെ പ്രമേയം 'നയാ ഭാരതം' എന്നതാണ്. 2047 ഓടെ ഇന്ത്യ ഒരു സമ്പന്നവും സുരക്ഷിതവും സ്വതന്ത്രവുമായ രാജ്യമാകുക എന്ന ലക്ഷ്യത്തെയാണ് ഈ പ്രമേയം ചിത്രീകരിക്കുന്നത്.