കഞ്ചാവിനെ അപകടകരമല്ലാത്ത ലഹരി മരുന്നുകളുടെ ലിസ്റ്റിൽ ഉൾപ്പെടുത്തുന്നതിനെക്കുറിച്ച് തന്റെ ഭരണകൂടം പരിശോധിച്ചുകൊണ്ടിരിക്കുകയാണെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ്.

തിങ്കളാഴ്ച വൈറ്റ് ഹൗസിൽ മാധ്യമപ്രവർത്തകരോട് സംസാരിക്കുന്നതിനിടെയാണ് ഇക്കാര്യം വ്യക്തമാക്കിയത്. അടുത്ത ഏതാനും ആഴ്ചകൾക്കുള്ളിൽ മരുന്നിന്റെ നിയമപരമായ വർഗ്ഗീകരണം സംബന്ധിച്ച് തീരുമാനമെടുക്കുമെന്നും ട്രംപ് അറിയിച്ചു.

ഇത് വളരെ സങ്കീർണമായ ഒരു വിഷയമാണെന്നും തീരുമാനം ശരിയായിരിക്കുമെന്നാണ് പ്രതീക്ഷ എന്നും ട്രംപ് പ്രതികരിച്ചു. വൈദ്യശാസ്ത്രപരമായ കഞ്ചാവിന്റെ ഉപയോഗത്തെക്കുറിച്ച് കേട്ടിട്ടുണ്ടെങ്കിലും പൊതുവിൽ കഞ്ചാവുമായി ബന്ധപ്പെട്ട് മോശം കാര്യങ്ങളാണ് പ്രചാരത്തിലുള്ളത്. ‌‌

ചിലരെ സംബന്ധിച്ച് കഞ്ചാവ് എന്നത് വെറുക്കപ്പെടുന്ന ഒന്നാണ്. കാരണം അത് കുട്ടികൾക്കും മുതിർന്നവർക്കും ശരിയായ രീതിയിലല്ല ഉപയോഗമെങ്കിൽ വളരെയധികം സങ്കീർണ്ണതകൾ ഉണ്ടാക്കുന്നു.

അതേ സമയം കഞ്ചാവ് ഉപയോഗത്തെ അനുകൂലിച്ചുള്ള ട്രമ്പിന്റെ പ്രസ്താവന എത്തിയതോടെ ഇതുമായി ബന്ധപ്പെട്ട ബിസിനസുകളുടെ ഓഹരികൾ കുതിച്ചുയർന്നു. ന്യൂയോർക്ക് ആസ്ഥാനമായുള്ള ടിൽറേ ബ്രാൻഡ്സ് ഏകദേശം 42 ശതമാനം ഉയർന്നു, കാനഡയിലെ വില്ലേജ് ഫാംസ് ഇന്റർനാഷണലും കനോപ്പി ഗ്രോത്ത് കോർപ്പും യഥാക്രമം 34 ശതമാനവും 26 ശതമാനവും വ്യാപാരം അവസാനിപ്പിച്ചു.

കഴിഞ്ഞയാഴ്ച നടന്ന ഒരു പരിപാടിയില്‍ കഞ്ചാവിനെ അപകടം കുറഞ്ഞ ലഹരി മരുന്നായി പുനര്‍വര്‍ഗ്ഗീകരിക്കാന്‍ താല്‍പ്പര്യമുണ്ടെന്ന് ട്രംപ് പറഞ്ഞതായി വാള്‍സ്ട്രീറ്റ് ജേണല്‍ റിപ്പോര്‍ട്ട് ചെയ്തിരുന്നു. ഇതിനുപിന്നാലെയാണ് തീരുമാനം പരിശോധിക്കുന്നതായി വൈറ്റ് ഹൗസില്‍ നിന്നും ഔദ്യോ​ഗികമായി അറിയിച്ചിരിക്കുന്നത്.

അമേരിക്കയിലെ 24 സംസ്ഥാനങ്ങളിൽ വിനോദ ആവശ്യങ്ങൾക്ക് ഉൾപ്പെടെ കഞ്ചാവ് പൂർണ്ണമായും നിയമപരമാണെങ്കിലും, ഫെഡറൽ തലത്തിൽ മയക്കുമരുന്നിന്റെ ഉപയോഗവും കൈവശം വയ്ക്കലും നിലവിൽ നിയമവിരുദ്ധമാണ്.

നിലവിൽ കഞ്ചാവ് ഷെഡ്യൂൾ I മരുന്നായാണ് തരംതിരിച്ചിരിക്കുന്നത്. ഇത് ഹെറോയിൻ, എൽഎസ്ഡി, എക്സ്റ്റസി എന്നിവയുടെ അതേ വിഭാഗത്തിലാണ് ഉൾപ്പെടുത്തിയിരിക്കുന്നത്.

ഡ്രഗ് എൻഫോഴ്‌സ്‌മെന്റ് അഡ്മിനിസ്ട്രേഷന്റെ വർഗ്ഗീകരണ സംവിധാനത്തിന് കീഴിൽ, ഷെഡ്യൂൾ I മരുന്നുകളെ നിലവിൽ അംഗീകൃത മെഡിക്കൽ ഉപയോഗമില്ലാത്തതും ദുരുപയോഗത്തിനുള്ള ഉയർന്ന സാധ്യതയുള്ളതുമായ മരുന്നുകളായി നിർവചിച്ചിരിക്കുന്നു.

മുൻ യുഎസ് പ്രസിഡന്റ് ജോ ബൈഡൻ കഞ്ചാവിനെ ഷെഡ്യൂൾ III മരുന്നായി പുനഃവർഗ്ഗീകരിക്കാൻ നിർദ്ദേശിച്ചിരുന്നു. ശാരീരികവും മാനസികവുമായ ആശ്രിതത്വത്തിന് മിതമായതോ താഴ്ന്നതോ ആയ സാധ്യതയുള്ളവ എന്നതാണ് അതിന്റെ നിർവചിചനം. എന്നാൽ ഓഫീസ് വിടുന്നതിനുമുമ്പ് മാറ്റം നടപ്പിലാക്കുന്നതിൽ പരാജയപ്പെട്ടു.