റഡാർ സംവിധാനത്തിലെ സാങ്കേതിക തകരാറിനെ തുടർന്ന് തിരുവനന്തപുരത്തുനിന്ന് ഡൽഹിയിലേക്ക് പുറപ്പെട്ട എയർ ഇന്ത്യ വിമാനം ചെന്നൈയിൽ അടിയന്തര ലാൻഡിങ് നടത്തി. വിമാനം പറന്നുയർന്ന് ഒരു മണിക്കൂറിനു ശേഷം വഴി തിരിച്ചുവിടുകയായിരുന്നു.

വിമാനത്തിൽ എംപിമാരായ കെ.സി. വേണുഗോപാൽ, കൊടിക്കുന്നിൽ സുരേഷ്, അടൂർ പ്രകാശ്, കെ. രാധാകൃഷ്ണൻ എന്നിവരടക്കം 4 എംപിമാർ ഉണ്ടായിരുന്നു. വൈകിട്ട് ഏകദേശം 7:45-ഓടെ തിരുവനന്തപുരത്തുനിന്ന് പുറപ്പെട്ട എയർ ഇന്ത്യ AI 2455 വിമാനത്തിലാണ് തകരാർ കണ്ടെത്തിയത്.

റഡാർ സംവിധാനത്തിലെ തകരാറാണ് അടിയന്തര ലാൻഡിങ് നടത്താൻ കാരണം. വിമാനത്തിൽ ഇന്ധനം പൂർണ്ണമായി ഉണ്ടായിരുന്നതിനാൽ, ആദ്യഘട്ടത്തിൽ ലാൻഡിങ് ശ്രമം ഉപേക്ഷിക്കുകയും, ഇന്ധനം തീർക്കുന്നതിനു വേണ്ടി വിമാനം അരമണിക്കൂറോളം ആകാശത്ത് വട്ടമിട്ട് പറക്കുകയും തുടർന്ന് രാത്രി 10:45-ഓടെ ചെന്നൈയിൽ സുരക്ഷിതമായി ഇറക്കുകയുമായിരുന്നു.അടിയന്തര ലാൻഡിങ്ങിനെ തുടർന്ന് യാത്രക്കാരെ മറ്റൊരു വിമാനത്തിൽ ഡൽഹിയിലേക്ക് അയക്കാനുള്ള സംവിധാനങ്ങൾ ചെയ്തു.