ശബരിമല സ്വർണ്ണക്കൊള്ള കേസിൽ കട്ടിളപ്പാളികൾ മാറ്റിയിട്ടില്ലെന്നും എന്നാൽ അതിൽ പൊതിഞ്ഞിരുന്ന സ്വർണ്ണം കവർന്നതായും ശാസ്ത്രീയ പരിശോധനയിൽ സ്ഥിരീകരിച്ചു. വി.എസ്.എസ്.സി (VSSC) ശാസ്ത്രജ്ഞർ നൽകിയ മൊഴിയിലാണ് ഈ നിർണ്ണായക വിവരങ്ങളുള്ളത്. നിലവിൽ ശബരിമലയിലുള്ളത് ഒറിജിനൽ ചെമ്പ് പാളികൾ തന്നെയാണ്. മെർക്കുറിയും മറ്റ് രാസലായനികളും ഉപയോഗിച്ചത് മൂലമാണ് പാളികളുടെ ഘടനയിൽ മാറ്റം സംഭവിച്ചതെന്ന് ശാസ്ത്രജ്ഞർ വിശദീകരിച്ചു.
പ്രതിയായ ഉണ്ണികൃഷ്ണൻ പോറ്റി കൊണ്ടുപോയി തിരികെ എത്തിച്ച പാളികളിൽ സ്വർണ്ണത്തിന്റെ അളവ് ഗണ്യമായി കുറഞ്ഞിട്ടുണ്ട്. കട്ടിളപ്പാളി പഴയത് തന്നെയാണെങ്കിലും അതിലെ സ്വർണ്ണം കവർന്നെടുത്തതായാണ് കണ്ടെത്തൽ. പാളികൾ മാറ്റി പുതിയവ വെച്ചതിന് തെളിവുകളില്ലെന്നും രാസഘടനാപരമായ മാറ്റങ്ങൾ മാത്രമാണ് സംഭവിച്ചതെന്നും റിപ്പോർട്ടിൽ പറയുന്നു. പഴയ വാതിലിൽ നിന്നുള്ള സാമ്പിളുകളുടെ പരിശോധനാ ഫലം കൂടി ഉൾപ്പെടുത്തി അന്തിമ റിപ്പോർട്ട് നൽകുമെന്ന് വി.എസ്.എസ്.സി അറിയിച്ചു.
അതേസമയം, കേസിൽ കുറ്റപത്രം സമർപ്പിക്കാൻ വൈകുന്നതിൽ പ്രത്യേക അന്വേഷണ സംഘത്തെ ഹൈക്കോടതി വീണ്ടും വിമർശിച്ചു. പ്രതികളെ അറസ്റ്റ് ചെയ്ത് 90 ദിവസം തികയാറാകുമ്പോഴും കുറ്റപത്രം നൽകാത്തത് മൂലം അവർക്ക് സ്വാഭാവിക ജാമ്യം ലഭിക്കാൻ ഇടയാക്കുന്നത് ഗുരുതരമായ വീഴ്ചയാണെന്ന് കോടതി ചൂണ്ടിക്കാട്ടി. കുറ്റപത്രം സമർപ്പിച്ചിരുന്നെങ്കിൽ ഈ സാഹചര്യം ഒഴിവാക്കാമായിരുന്നുവെന്നും കോടതി നിരീക്ഷിച്ചു.