ശബരിമല സ്വർണ്ണ മോഷണക്കേസുമായി ബന്ധപ്പെട്ട് തിരുവിതാംകൂർ ദേവസ്വം ബോർഡ് ആസ്ഥാനത്തും പ്രതികളുടെ വീടുകളിലും സ്ഥാപനങ്ങളിലും എൻഫോഴ്സ്മെന്റ് ഡയറക്ടറേറ്റ് (ഇഡി) വ്യാപക റെയ്ഡ് നടത്തി. പത്മകുമാറിന്റെ ആറന്മുളയിലെ വീട്, ഉണ്ണികൃഷ്ണൻ പോറ്റിയുടെ വീട്, എൻ. വാസുവിന്റെ പേട്ടയിലെ വസതി എന്നിവിടങ്ങളിലാണ് പ്രധാനമായും പരിശോധന നടന്നത്. കേരളത്തിന് പുറമെ ചെന്നൈയിലെ സ്മാർട്ട് ക്രിയേഷൻസ് എന്ന സ്ഥാപനത്തിലും, ബംഗളൂരുവിലെ ഗോവർദ്ധന്റെ വീടുകളിലും സ്ഥാപനങ്ങളിലും ഇഡി സംഘം പരിശോധന നടത്തി.
ശബരിമലയിൽ നടന്നത് അതീവ ഗുരുതരമായ മോഷണമാണെന്ന് വ്യക്തമാക്കുന്ന റിപ്പോർട്ടുകളാണ് ഇപ്പോൾ പുറത്തുവരുന്നത്. ക്ഷേത്ര ശ്രീകോവിലിന്റെ വാതിലിൽ സ്ഥാപിച്ചിരുന്ന സ്വർണ്ണം പോലും നഷ്ടപ്പെട്ടതായാണ് പ്രാഥമിക സൂചനകൾ. സന്നിധാനത്തെ പഴയ വാതിലിൽ നിന്നും വലിയ അളവിൽ സ്വർണ്ണം മോഷണം പോയിട്ടുണ്ടോ എന്ന കാര്യത്തിൽ അന്വേഷണം പുരോഗമിക്കുകയാണ്. ദേവസ്വം ബോർഡിന്റെ ഉന്നത ഉദ്യോഗസ്ഥരെയും മുൻ ഭാരവാഹികളെയും കേന്ദ്രീകരിച്ചാണ് ഇഡി നിലവിൽ അന്വേഷണം ഊർജ്ജിതമാക്കിയിരിക്കുന്നത്.