ശബരിമല സ്വർണ്ണ മോഷണക്കേസിലെ പതിനൊന്നാം പ്രതിയും ദേവസ്വം ബോർഡ് മുൻ അംഗവുമായ കെ.പി. ശങ്കരദാസിനെ കൊല്ലം വിജിലൻസ് കോടതി 14 ദിവസത്തേക്ക് റിമാൻഡ് ചെയ്തു. ആരോഗ്യപ്രശ്നങ്ങളെ തുടർന്ന് തിരുവനന്തപുരത്തെ സ്വകാര്യ ആശുപത്രിയിൽ ചികിത്സയിൽ കഴിയുന്ന ശങ്കരദാസിനെ ആശുപത്രിയിലെത്തിയാണ് ജഡ്ജി റിമാൻഡ് ചെയ്തത്. നിലവിൽ ആശുപത്രിയിൽ തുടരാൻ അനുവദിച്ചിട്ടുള്ള ഇദ്ദേഹത്തെ തിരുവനന്തപുരം മെഡിക്കൽ കോളേജിലേക്ക് മാറ്റുന്ന കാര്യത്തിൽ പിന്നീട് തീരുമാനമെടുക്കും. ദിവസങ്ങളായി ഐ.സി.യുവിൽ ആയിരുന്ന ശങ്കരദാസിനെ മുറിയിലേക്ക് മാറ്റിയതിന് പിന്നാലെയാണ് പ്രത്യേക അന്വേഷണ സംഘം (SIT) അറസ്റ്റ് രേഖപ്പെടുത്തിയത്.

എ. പത്മകുമാർ ദേവസ്വം ബോർഡ് പ്രസിഡന്റായിരുന്ന കാലയളവിൽ ബോർഡ് അംഗമായിരുന്ന ശങ്കരദാസിനെ അറസ്റ്റ് ചെയ്യാത്തതിനെതിരെ ഹൈക്കോടതി നേരത്തെ കടുത്ത ഭാഷയിൽ പ്രതികരിച്ചിരുന്നു. കേസിൽ പ്രതിയാക്കപ്പെട്ടതിന് പിന്നാലെ ആശുപത്രിയിൽ ചികിത്സ തേടിയ നടപടിയെ 'അസംബന്ധം' എന്നാണ് കോടതി വിശേഷിപ്പിച്ചത്. ഒരു ഉന്നത പോലീസ് ഉദ്യോഗസ്ഥന്റെ പിതാവാണ് ശങ്കരദാസ് എന്ന കാര്യം അന്വേഷണ സംഘത്തെ ഓർമ്മിപ്പിച്ച കോടതി, നിയമം എല്ലാവർക്കും ഒരുപോലെയാണെന്നും വ്യക്തമാക്കിയിരുന്നു. ഈ കോടതി ഇടപെടലിന് പിന്നാലെയാണ് ഇപ്പോൾ അറസ്റ്റും റിമാൻഡ് നടപടികളും പൂർത്തിയായിരിക്കുന്നത്.