ശബരിമല സ്വർണ്ണ മോഷണക്കേസിൽ പ്രതി ഉണ്ണികൃഷ്ണൻ പോറ്റി സമർപ്പിച്ച രണ്ട് ജാമ്യഹർജികളും കൊല്ലം വിജിലൻസ് കോടതി തള്ളി. കേസിൽ ആദ്യം അറസ്റ്റിലായ താൻ 90 ദിവസമായി റിമാൻഡിലാണെന്ന വാദം കോടതി അംഗീകരിച്ചില്ല. തൊണ്ടിമുതൽ ഇനിയും കണ്ടെടുക്കാനുണ്ടെന്ന പ്രത്യേക അന്വേഷണ സംഘത്തിന്റെ (SIT) വാദം പരിഗണിച്ചാണ് കോടതിയുടെ നടപടി. ഉണ്ണികൃഷ്ണൻ പോറ്റിയുടെ ജാമ്യം നിഷേധിക്കപ്പെടുന്നത് ഇത് രണ്ടാം തവണയാണ്; നേരത്തെ ഹൈക്കോടതിയും ഇദ്ദേഹത്തിന്റെ ജാമ്യാപേക്ഷ തള്ളിയിരുന്നു.

അതേസമയം, കേസുമായി ബന്ധപ്പെട്ട് തന്ത്രി കണ്ഠരര് രാജീവരുടെ അറസ്റ്റ് രേഖപ്പെടുത്താൻ വിജിലൻസ് കോടതി എസ്.ഐ.ടിക്ക് അനുമതി നൽകി. കേസിലെ മറ്റൊരു പ്രതിയായ ദേവസ്വം ബോർഡ് മുൻ പ്രസിഡന്റ് എ. പത്മകുമാറിനെ കോടതി 14 ദിവസത്തേക്ക് കൂടി റിമാൻഡ് ചെയ്തു. ഇതിനിടെ, ദേവസ്വം ബോർഡ് മുൻ അംഗം എ.പി. ശങ്കർദാസ് സമർപ്പിച്ച മുൻകൂർ ജാമ്യഹർജിയിൽ കൊല്ലം ജില്ലാ സെഷൻസ് കോടതി ഇന്ന് വിശദമായ വാദം കേൾക്കും. ശങ്കർദാസ് അബോധാവസ്ഥയിലാണെന്ന വിവരം ഫോട്ടോ സഹിതം അഭിഭാഷകൻ കോടതിയെ അറിയിച്ചിട്ടുണ്ട്.