ഇന്ത്യയുടെ യാത്രാമേഖലയിൽ വിപ്ലവകരമായ മാറ്റം കുറിച്ചുകൊണ്ട് അടുത്ത വർഷം മുതൽ രാജ്യത്ത് ബുള്ളറ്റ് ട്രെയിൻ സർവീസുകൾ ആരംഭിക്കുമെന്ന് റെയിൽവേ മന്ത്രി അശ്വിനി വൈഷ്ണവ് പ്രഖ്യാപിച്ചു. 2027-ലെ സ്വാതന്ത്ര്യ ദിനത്തോടനുബന്ധിച്ച് പദ്ധതി യാഥാർത്ഥ്യമാകുമെന്ന് അദ്ദേഹം അറിയിച്ചു. മുംബൈയ്ക്കും അഹമ്മദാബാദിനും ഇടയിലുള്ള 508 കിലോമീറ്റർ ദൈർഘ്യമുള്ള ഈ പദ്ധതി, ഇന്റർ-സിറ്റി യാത്രയിൽ വലിയ വിപ്ലവം സൃഷ്ടിക്കുമെന്നും യാത്രാ സമയം ഗണ്യമായി കുറയ്ക്കുമെന്നും അദ്ദേഹം വ്യക്തമാക്കി.

മുംബൈ-അഹമ്മദാബാദ് ഹൈ-സ്പീഡ് റെയിൽ (MAHSR) ഇടനാഴി ഘട്ടം ഘട്ടമായാണ് ഉദ്ഘാടനം ചെയ്യുക. സൂറത്ത് മുതൽ ബിലിമോറ വരെയുള്ള ആദ്യ ഭാഗം ആദ്യം തുറക്കും. തുടർന്ന് വാപ്പി മുതൽ സൂററ്റ് വരെയും, പിന്നീട് വാപ്പി മുതൽ അഹമ്മദാബാദ് വരെയും സർവീസുകൾ വ്യാപിപ്പിക്കും. അടുത്ത ഘട്ടത്തിൽ താനെ മുതൽ അഹമ്മദാബാദ് വരെയും, അവസാന ഘട്ടത്തിൽ മുംബൈ മുതൽ അഹമ്മദാബാദ് വരെയുള്ള മുഴുവൻ പാതയും ഗതാഗതത്തിന് സജ്ജമാകും. ഇതോടെ ഇന്ത്യ ലോകോത്തര ഹൈ-സ്പീഡ് റെയിൽ നിലവാരത്തിലേക്ക് ഉയരുമെന്നും ഗതാഗത അടിസ്ഥാന സൗകര്യങ്ങളിൽ രാജ്യം പുതിയ ചരിത്രം കുറിക്കാൻ ഒരുങ്ങുകയാണെന്നും മന്ത്രി കൂട്ടിച്ചേർത്തു.