ക്രിസ്മസ് തലേന്ന് എടിഎം മെഷീൻ കവർച്ച ചെയ്യാനുള്ള ശ്രമത്തിനിടെ വ്യാപാര സ്ഥാപനത്തിന്റെ മുൻഭാഗം തകർത്തു. ഇന്നലെ പുലർച്ചെ ഫോർട്ട് വർത്തിലെ കൺവീനിയൻസ് സ്റ്റോറിലാണ് സംഭവം.ഒരു വാഹനം ഉപയോഗിച്ച് എടിഎം മെഷീൻ കെട്ടിവലിച്ചാണ് കെട്ടിടത്തിന്റെ ചില്ലുവാതിലുകളും മുൻഭാഗവും തകർത്ത് മോഷണശ്രമം നടത്തിയത്. അതിശക്തമായ രീതിയിൽ മെഷീൻ വലിച്ചുകൊണ്ടുപോകാൻ ശ്രമിച്ചതോടെ കടയുടെ മുൻഭാഗം പൂർണ്ണമായും തകരുകയായിരുന്നു.
എങ്കിലും കവർച്ചാ ശ്രമം പരാജയപ്പെട്ടതായാണ് റിപ്പോർട്ടുകൾ സൂചിപ്പിക്കുന്നത്. എടിഎം മെഷീൻ കടയിൽ നിന്നും പുറത്തേക്ക് വലിച്ചിഴച്ചെങ്കിലും പണം കൊണ്ടുപോകാൻ മോഷ്ടാക്കൾക്ക് കഴിഞ്ഞില്ല. വലിയ ശബ്ദം കേട്ട് നാട്ടുകാർ ശ്രദ്ധിക്കുമെന്ന ഭയത്താലോ മെഷീൻ വാഹനത്തിൽ കയറ്റാൻ കഴിയാത്തതിനാലോ പ്രതികൾ മെഷീൻ ഉപേക്ഷിച്ച് കടന്നുകളയുകയായിരുന്നു. സംഭവത്തിൽ പോലീസ് അന്വേഷണം ഊർജിതമാക്കിയിട്ടുണ്ട്. സിസിടിവി ദൃശ്യങ്ങൾ കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്.