യുഎസിലെ ഫുഡ് ആൻഡ് ഡ്രഗ് അഡ്മിനിസ്‌ട്രേഷൻ (എഫ്.ഡി.എ) ഉയർന്ന രക്തസമ്മർദ്ദത്തിനുള്ള ഒരു പ്രത്യേക കോമ്പിനേഷൻ മരുന്ന് തിരിച്ചുവിളിക്കാൻ നിർമ്മാതാക്കളോട് ആവശ്യപ്പെട്ടു. 'ബിസോപ്രോലോൾ ഫ്യൂമറേറ്റ്, ഹൈഡ്രോക്ലോറോതയാസൈഡ് ടാബ്‌ലെറ്റുകൾ യു.എസ്.പി.' (Bisoprolol Fumarate and Hydrochlorothiazide Tablets, USP) എന്ന പേരിലുള്ള ഈ മരുന്നിൽ കൊളസ്‌ട്രോൾ കുറയ്ക്കാൻ ഉപയോഗിക്കുന്ന 'ഇസെറ്റിമൈബിന്റെ' (ezetimibe) അംശം കലർന്നിട്ടുണ്ട് എന്ന് കണ്ടെത്തിയതിനെ തുടർന്നാണ് നടപടി. ഉത്പാദന വേളയിൽ സംഭവിച്ച 'ക്രോസ് കണ്ടാമിനേഷൻ' (Cross Contamination) മൂലമാണ് മരുന്നുകൾ കലർന്നുപോയതെന്ന് സ്ഥിരീകരിച്ചിട്ടുണ്ട്.

ഗ്ലെൻമാർക്ക് ഫാർമസ്യൂട്ടിക്കൽസ് ഇൻക്., യു.എസ്.എ. എന്ന കമ്പനിയാണ് ഈ മരുന്ന് വിതരണം ചെയ്തിരുന്നത്. 2.5 മില്ലിഗ്രാം/ 6.25 മില്ലിഗ്രാം ശക്തിയിലുള്ള ഈ മരുന്നിന്റെ 30, 100, 500 എണ്ണം വീതമുള്ള കുപ്പികളാണ് തിരിച്ചുവിളിക്കുന്നത്. ഇന്ത്യയിൽ നിർമ്മിച്ച ഈ മരുന്നുകൾ രാജ്യവ്യാപകമായി വിതരണം ചെയ്തിരുന്നു. ഈ നടപടിയെ എഫ്.ഡി.എ. ഏറ്റവും കുറഞ്ഞ അപകടസാധ്യതയുള്ള 'ക്ലാസ്സ് III' വിഭാഗത്തിലാണ് ഉൾപ്പെടുത്തിയിരിക്കുന്നത്. അതായത്, മരുന്ന് ഉപയോഗിക്കുന്നത് ഗുരുതരമായ ആരോഗ്യപ്രശ്നങ്ങളോ ചികിത്സയിലൂടെ മാറ്റാൻ കഴിയാത്ത പ്രത്യാഘാതങ്ങളോ ഉണ്ടാക്കാൻ സാധ്യത വളരെ കുറവാണ്. പൊതുജനാരോഗ്യത്തിന് മരുന്ന് നിർമ്മാണത്തിലെ ഗുണനിലവാരം ഉറപ്പാക്കേണ്ടതിന്റെ ആവശ്യകതയാണ് ഈ സംഭവം വീണ്ടും ഓർമ്മിപ്പിക്കുന്നത്. രോഗികൾ തങ്ങളുടെ മരുന്നിന്റെ ലേബലുകൾ പരിശോധിക്കാനും എന്തെങ്കിലും സംശയങ്ങളുണ്ടെങ്കിൽ ഡോക്ടർമാരുമായി കൂടിയാലോചിക്കാനും അധികൃതർ നിർദ്ദേശം നൽകിയിട്ടുണ്ട്.