ഫൊക്കാനയുടെ നേതൃത്വത്തിൽ മെഡിക്കൽ ഇൻഷുറൻസ് ഇല്ലാത്തവർക്ക് ചികിത്സ ലഭ്യമാക്കാൻ ലക്ഷ്യമിട്ടുള്ള ഫൊക്കാന ഹെൽത്ത് ക്ലിനിക്ക് പ്രശസ്ത ജീവകാരുണ്യ പ്രവർത്തകനും മജിഷ്യനുമായ പ്രൊഫ. ഗോപിനാഥ് മുതുകാട് ഉദ്ഘാടനം ചെയ്തു. നാട്ടിൽ നിന്നും മറ്റും വരുന്ന ബന്ധുക്കൾക്ക് മെഡിക്കൽ ഇൻഷുറൻസ് ഇല്ലാത്ത സാഹചര്യത്തിൽ ഇത് പ്രയോജനപ്പെടണമെന്ന ഉദ്ദേശത്തോടെയാണ് ക്ലിനിക്ക് വിഭാവനം ചെയ്തതെന്ന് ഫൊക്കാന പ്രസിഡന്റ് സജിമോൻ ആന്റണി അറിയിച്ചു.

ക്ലിനിക്ക് തുടങ്ങുന്നതിൽ സാങ്കേതിക, സാമ്പത്തിക പ്രശ്നങ്ങൾ (പ്രത്യേകിച്ച് മാൽപ്രാക്ടീസ് ഇൻഷുറൻസിനായി ഒരു മാസം 4000 ഡോളർ വേണം) ഉള്ളതിനാൽ, നിലവിൽ ക്ലിനിക്കുകളുള്ള മലയാളി ഡോക്ടർമാരുമായി സഹകരിച്ചാണ് പദ്ധതി നടപ്പാക്കുന്നത്. ബോസ്റ്റണിലും ന്യൂജേഴ്‌സിയിലുമാണ് ഇതിന് തുടക്കം കുറിച്ചിരിക്കുന്നത്.

ബോസ്റ്റണിലെ ഓഫീസ്

ഡോ. രേഖ നായർ, എംഡി (Rhythm Medical, 176 East Main Street, Suite #4, Westborough, MA 01581).

ലഭ്യമായ ദിവസങ്ങൾ: തിങ്കൾ മുതൽ വെള്ളി വരെ.

ന്യൂ ജേഴ്‌സിയിലെ ഓഫീസ്

ഡോ. ജെയിംസ് എബ്രഹാം, എംഡി (124 Gregory Ave, Passaic, NJ, 07055).

ലഭ്യമായ ദിവസങ്ങൾ: തിങ്കൾ, ബുധൻ, വ്യാഴം, വെള്ളി.

നമ്മുടെ പ്രായം ചെന്ന മാതാപിതാക്കളെ ചേർത്തുപിടിക്കാൻ ഈ ഹെൽത്ത് ക്ലിനിക്കിന് സാധിക്കട്ടെയെന്ന് ആശംസിച്ചുകൊണ്ട് ഗോപിനാഥ് മുതുകാട് ക്ലിനിക്കിന്റെ ഉദ്ഘാടനം നിർവഹിച്ചു. ഫൊക്കാനയുടെ ചരിത്രത്തിൽ ഒരു നാഴികക്കല്ലായി മാറുന്ന ഈ പദ്ധതി, സ്വപ്നം കാണുവാൻ മാത്രമല്ല, അത് പ്രാവർത്തികമാക്കാനുള്ള ഇച്ഛാശക്തി ഈ കമ്മിറ്റിക്കുണ്ടെന്ന് തെളിയിക്കുന്നു. ഹെൽത്ത് കെയർ മേഖലയിൽ ഈ കമ്മിറ്റി വിപ്ലവകരമായ മാറ്റമാണ് കൊണ്ടുവന്നിട്ടുള്ളതെന്നും അദ്ദേഹം അഭിപ്രായപ്പെട്ടു.

ആരോഗ്യത്തിന്റെ പ്രാധാന്യത്തെക്കുറിച്ചും നമ്മുടെ ആന്തരികാവയവങ്ങൾ പ്രതിഫലേച്ഛയില്ലാതെ ചെയ്യുന്ന സേവനങ്ങളെക്കുറിച്ചും ഗോപിനാഥ് മുതുകാട് വിശദമായി സംസാരിച്ചു. രോഗം സ്വാഭാവികമായും വന്നുചേരും, കാലം എല്ലാം തിരിച്ചുചോദിക്കുമെന്നും അദ്ദേഹം ഓർമ്മിപ്പിച്ചു. മാതാപിതാക്കൾ അമേരിക്കയിൽ സന്ദർശനത്തിന് വരുമ്പോൾ അവരുടെ രോഗാവസ്ഥയിൽ ഈ രാജ്യം എന്തുചെയ്യും എന്ന ചോദ്യത്തിന് ഫൊക്കാന നൽകുന്ന മറുപടിയാണ് ഈ മനോഹരവും നൂതനവുമായ ആശയം. ഈ ആശയവുമായി മുന്നോട്ട് വന്ന സജിമോൻ ആന്റണി ഉൾപ്പെടെയുള്ള ഭാരവാഹികളെ അദ്ദേഹം അഭിനന്ദിച്ചു. ആരോഗ്യമേഖലയുമായി ബന്ധപ്പെട്ട ഫൊക്കാനയുടെ ഈ പ്രവർത്തനങ്ങളെ അദ്ദേഹം പ്രശംസിച്ചു.

ഫൊക്കാന ജനറൽ സെക്രട്ടറി ശ്രീകുമാർ ഉണ്ണിത്താൻ ഏവർക്കും സ്വാഗതം പറഞ്ഞു. ട്രഷറർ ജോയ് ചാക്കപ്പൻ, ട്രസ്റ്റി ബോർഡ് ചെയർമാൻ ജോജി തോമസ് എന്നിവർ ആശംസകൾ നേർന്നു. വിപിൻ രാജ് നന്ദി പറഞ്ഞു. പ്രവീൺ തോമസ്, രേവതി പിള്ള എന്നിവരായിരുന്നു എംസിമാർ.