വാഷിംഗ്ടൺ ഡി.സി.: മുൻ അമേരിക്കൻ പ്രസിഡന്റ് ജോ ബൈഡൻ പുറപ്പെടുവിച്ച എക്‌സിക്യൂട്ടീവ് ഉത്തരവുകളിൽ 92 ശതമാനവും റദ്ദാക്കുമെന്ന് നിലവിലെ പ്രസിഡന്റ് ഡോണൾഡ് ട്രംപ് പ്രഖ്യാപിച്ചു. ബൈഡൻ സ്വന്തമായി ഒപ്പിടാതെ ഓട്ടോപെൻ സംവിധാനം ഉപയോഗിച്ചാണ് ഉത്തരവുകൾ ഒപ്പിട്ടതെന്നും അതിനാൽ അവ നിയമപരമായി നിലനിൽക്കില്ലെന്നുമാണ് ട്രംപിന്റെ വാദം.ബൈഡൻ്റെ ഉത്തരവുകൾ ഒപ്പിടാൻ ഉപയോഗിച്ച ഓട്ടോപെൻ (Autopen - ഒപ്പുകൾ യന്ത്രസഹായത്താൽ പതിക്കുന്ന ഉപകരണം) സംവിധാനം നിയമവിരുദ്ധമായി പ്രവർത്തിപ്പിച്ചത് അദ്ദേഹത്തിന് ചുറ്റുമുള്ള റാഡിക്കൽ ഇടതുപക്ഷക്കാരാണെന്നും ട്രംപ് വിമർശിച്ചു. ട്രംപിൻ്റെ വാക്കുകൾ: "സ്ലീപ്പി ജോ ബൈഡൻ ഓട്ടോപെൻ ഉപയോഗിച്ച് ഒപ്പിട്ട എല്ലാ രേഖകളും, അതായത് ഏകദേശം 92 ശതമാനത്തോളം വരുന്നവ, ഇതോടെ റദ്ദാക്കിയിരിക്കുന്നു. അവയ്ക്ക് യാതൊരു നിയമപരമായ സാധുതയുമില്ല.

" പ്രസിഡന്റിന്റെ വ്യക്തമായ അനുമതിയില്ലാതെ ഓട്ടോപെൻ ഉപയോഗിക്കാൻ പാടില്ലെന്നും ട്രംപ് കൂട്ടിച്ചേർത്തു.ബൈഡൻ ഭരണകൂടത്തെ നിയന്ത്രിച്ചിരുന്നത് അദ്ദേഹത്തിന് ചുറ്റുമുള്ള "റാഡിക്കൽ ലെഫ്റ്റ് ലുണാറ്റിക്സ്" ആണെന്നും, ഓട്ടോപെൻ പ്രവർത്തിപ്പിച്ചവർ നിയമവിരുദ്ധമായാണ് അത് ചെയ്തതെന്നും ട്രംപ് ആരോപിച്ചു. ബൈഡൻ നേരിട്ട് ഒപ്പിടാത്ത എല്ലാ എക്‌സിക്യൂട്ടീവ് ഉത്തരവുകളും മറ്റു രേഖകളും റദ്ദാക്കുന്നുവെന്നും ട്രംപ് അറിയിച്ചു.പ്രസിഡന്റുമാർ ഓട്ടോപെൻ ഉപയോഗിക്കുന്നത് സാധാരണമാണെങ്കിലും, ബൈഡൻ്റെ ഭരണകാലത്തെ ഇതിൻ്റെ ഉപയോഗം അദ്ദേഹത്തിന് രാജ്യകാര്യങ്ങളിൽ നിയന്ത്രണമില്ലായിരുന്നുവെന്ന് തെളിയിക്കുന്നുവെന്നാണ് ട്രംപിൻ്റെ നിരന്തരമായ ആരോപണം. ഈ പ്രഖ്യാപനത്തിൻ്റെ നിയമപരമായ സാധുതയെക്കുറിച്ച് നിയമ വിദഗ്ദ്ധർക്കിടയിൽ സംശയങ്ങളുണ്ട്.