വാഷിങ്ങ്ടൺ: മലയാളി സംഘടനകളുടെ സംഘടനയായ ഫൊക്കാനയുടെ അടുത്ത രണ്ടു വർഷത്തേക്കുള്ള (2026-2028) ഭരണസമിതിയിലേക്ക് വാഷിങ്ങ്ടൺ ഡി.സി.യിലെ യുവനേതാവ് നിജോ പുത്തൻപുരക്കൽ നാഷണൽ കമ്മിറ്റി മെമ്പർ സ്ഥാനത്തേക്ക് ലീലാ മാരേട്ടിൻ്റെ പാനലിൽ മത്സരിക്കുന്നു. ആലപ്പുഴ ജില്ലയിൽ തലവടി ചിറമേൽ കുടുംബാംഗമാണ് നിജോ. ചെന്നൈ അണ്ണാ യൂണിവേഴ്സിറ്റിയിൽ നിന്ന് ഇലക്ട്രിക്കൽ എഞ്ചിനീയറിംഗിൽ ബി.ടെക് ബിരുദം നേടി. നിലവിൽ സിറ്റി ഓഫ് ബൾട്ടിമോർനിൽ എഞ്ചിനീയറായി ജോലി ചെയ്യുന്നു.
വാഷിങ്ങ്ടൺ ഡി .സി.യിലെയും മേരിലാൻഡിലെയും എല്ലാ മലയാളി അസോസിയേഷനുകളിലും സജീവ പ്രവർത്തകനും, മലയാളികൾക്കിടയിൽ സുപരിചിതനാണ് നിജോ. അമേരിക്കയിലെത്തി ചുരുങ്ങിയ കാലയളവിൽ വിപുലമായ സൗഹൃദവലയം കെട്ടിപ്പടുക്കാൻ അദ്ദേഹത്തിന് സാധിച്ചു. നിലവിൽ ഫൊക്കാന വാഷിങ്ങ്ടൺ ഡി .സി റീജിയൻ മീഡിയ & പബ്ലിസിറ്റി കൺവീനർ, കൈരളി ഓഫ് ബാൾട്ടിമോർൻ്റെ (KOB) പബ്ലിക് റിലേഷൻസ് & സോഷ്യൽ മീഡിയ കമ്മിറ്റി അംഗം, ഇന്ത്യൻ ഓവർസീസ് കോൺഗ്രസ് വാഷിങ്ങ്ടൺ ഡി .സി ചാപ്റ്ററിൻ്റെ നാഷണൽ കമ്മിറ്റി അംഗം, പ്രവാസി മലയാളി ഫെഡറേഷൻ (PMF) നോർത്ത് അമേരിക്ക റീജിയൺ കമ്മ്യൂണിറ്റി ഫോറം ചെയർ എന്നീ നിലകളിൽ നിജോ പ്രവർത്തിക്കുന്നു.
പഠനകാലത്ത് നാഷണൽ സർവീസ് സ്കീം ക്യാമ്പ് സംഘാടകൻ, YMCA യൂത്ത് കോർഡിനേറ്റർ എന്നി നിലകളിൽ പ്രവർത്തിച്ച് സംഘടനാ രംഗത്തേക്ക് കടന്നുവന്ന നിജോ പുത്തൻപുരക്കൽ പിന്നീട് ഇന്ത്യൻ നാഷണൽ കോൺഗ്രസിൻ്റെ പ്രവർത്തകനായി സ്കൂൾ-കോളേജ് തലങ്ങളിൽ പ്രവർത്തിച്ചു. യൂത്ത് കോൺഗ്രസ് തലവടി ജനറൽ സെക്രട്ടറി, വൈസ് പ്രസിഡന്റ്, തലവടി YMCA ബോർഡ്‌ മെമ്പർ എന്നീ സ്ഥാനങ്ങളും അദ്ദേഹം വഹിച്ചിട്ടുണ്ട്. കോൺഗ്രസിൻ്റെ കടുത്ത അനുഭാവിയായ അദ്ദേഹം രാഷ്ട്രീയത്തിലെ പല ഉന്നത നേതാക്കന്മാരുമായി ഇപ്പോഴും വ്യക്തിബന്ധം കാത്തുസൂക്ഷിക്കുന്നു.
ഒരു തനി കുട്ടനാട്ടുകാരൻ കൂടിയായ നിജോ തികഞ്ഞ വള്ളം കളി പ്രേമിയാണ്. തലവടി ചുണ്ടൻ വള്ളത്തിൻ്റെ ഓഹരി ഉടമയും തലവടി ചുണ്ടൻ ടൗൺ ബോട്ട് ക്ലബ്ബിൻ്റെ ഭരണസമിതി അംഗവുമാണ്. തലവടി ചുണ്ടൻ ഓവർസീസ് ഫാൻസ് അസോസിയേഷൻ-TOFA യുടെ സ്ഥാപക സെക്രട്ടറിയും നിലവിലെ ജോയിന്റ് സെക്രട്ടറിയുമാണ് അദ്ദേഹം. തലവടി ചുണ്ടനെ കൂടാതെ, വെപ്പ് എ ഗ്രേഡ് വള്ളമായ നെപ്പോളിയൻ്റെ ഓഹരിയുടമ കൂടിയാണ്.
നിജോയുടെ സംഘടനാമികവും, നേതൃപാടവവും ഫൊക്കാനയുടെ അടുത്ത ഭരണസമിതിയിൽ ഒരു മുതൽക്കൂട്ടാകും എന്ന കാര്യത്തിൽ സംശയമില്ലെന്ന് ഫൊക്കാന വൈസ് പ്രസിഡന്റ് വിപിൻ രാജ് അഭിപ്രായപ്പെട്ടു. കഴിവുള്ള പ്രവർത്തകരാണ് ഫൊക്കാനയെ വളർത്തുന്നത് എന്നും, വാഷിങ്ങ്ടൺ ഡി .സി. റീജിയനിൽ നിന്നുള്ള എല്ലാവരും നിജോയെ ഒരേ സ്വരത്തിൽ പിന്തുണയ്ക്കുന്നുവെന്നും അദ്ദേഹത്തിൻ്റെ സ്ഥാനാർത്ഥിത്വം ഫൊക്കാനക്ക് ശക്തി പകരുമെന്നും റീജിയണൽ വൈസ് പ്രസിഡന്റ് ബെൻ പോൾ പറഞ്ഞു. യുവതലമുറയെ അംഗീകരിക്കുന്നതിൽ ഫൊക്കാന എപ്പോഴും മുൻപന്തിയിലാണ്. നിജോയുടെ സ്ഥാനാർത്ഥിത്വം യുവാക്കൾക്ക് ഒരു അംഗീകാരമാണ്. അദ്ദേഹത്തെപ്പോലെ പ്രവർത്തന പാരമ്പര്യമുള്ള പൊതുപ്രവർത്തകർ ഫൊക്കാനയുടെ നേതൃത്വനിരയിലേക്ക് വരുന്നത് സന്തോഷകരമാണെന്ന് ഫൊക്കാന നാഷണൽ കമ്മിറ്റി അംഗങ്ങളായ മനോജ് മാത്യു, ഷിബു സാമുവൽ എന്നിവർ അഭിപ്രായപ്പെട്ടു. ഫൊക്കാന നാഷണൽ കമ്മിറ്റിയിലേക്കുള്ള തിരഞ്ഞെടുപ്പിൽ എല്ലാവരുടെയും പിന്തുണയും സഹകരണവും നിജോ അഭ്യർത്ഥിച്ചു.