ഫിലഡൽഫിയ: ഫൊക്കാനയുടെ നാഷണൽ കമ്മിറ്റിയിലേക്ക് മാത്യു ചെറിയാൻ (മോൻസി) മത്സരിക്കുന്നു. ഫൊക്കാനയുടെ 2026-2028 വർഷത്തേക്കുള്ള നാഷണൽ കമ്മിറ്റിയിലേക്കാണ് മത്സരിക്കുന്നത്. മികച്ച സാമൂഹ്യ സാംസ്‌കാരിക പ്രവർത്തകൻ, സംഘടനാ പ്രവർത്തകൻ തുടങ്ങി നിരവധി മേഖലകളിൽ തൻ്റേതായ വ്യക്തിമുദ്ര പതിപ്പിച്ച ബഹുമുഖ പ്രതിഭയാണ് മാത്യു ചെറിയാൻ.

കഴിഞ്ഞ ഫൊക്കാന കൺവെൻഷനുകളിലെല്ലാം സജീവ സാന്നിധ്യമായിരുന്ന അദ്ദേഹം, 2023-ൽ ഫിലഡൽഫിയയിൽ നടന്ന ഫൊക്കാന റീജനൽ കൺവെൻഷന് നേതൃത്വം നൽകിയവരിൽ ഒരാളായിരുന്നു. ഫൊക്കാനയുടെ നിരവധി പരിപാടികളിൽ സജീവമായി പങ്കെടുത്തുകൊണ്ട് കഴിവ് തെളിയിച്ച മാത്യു ചെറിയാൻ, ഫൊക്കാനയുടെ പെൻസിൽവേനിയ റീജൻ്റെ പ്രവർത്തനം വ്യാപിപ്പിക്കുന്നതിനും കൂടുതൽ സംഘടനകളെ ഫൊക്കാനയുടെ ഭാഗമാക്കുന്നതിലും നിർണായക പങ്ക് വഹിക്കുന്നുണ്ട്. ഫിലഡൽഫിയയിലെ വിവിധ മലയാളി അസോസിയേഷനുകളുമായും സഹകരിച്ചു പ്രവർത്തിക്കുന്ന ഇദ്ദേഹം, പെൻസിൽവേനിയ മലയാളി അസോസിയേഷൻ്റെ (പി.എം.എ.) രൂപീകരണത്തിൽ മുഖ്യപങ്കുവഹിച്ച വ്യക്തി കൂടിയാണ്.