വാഷിംഗ്ടൺ: വെനസ്വേലൻ പ്രസിഡൻ്റ് നിക്കോളാസ് മഡൂറോ ഉൾപ്പെടെയുള്ള ഉന്നതർ നേതൃത്വം നൽകുന്നുവെന്ന് അമേരിക്ക ആരോപിക്കുന്ന കാർട്ടൽ ഡി ലോസ് സോൾസ് എന്ന സംഘടനയെ വിദേശ ഭീകരസംഘടനയായി ഔദ്യോഗികമായി പ്രഖ്യാപിച്ച് അമേരിക്ക. യുഎസ് ട്രഷറി ഡിപ്പാർട്ട്‌മെൻ്റിൻ്റെ വെബ്സൈറ്റിലാണ് ഇത് സംബന്ധിച്ച നോട്ടീസ് യുഎസ് പുറത്തുവിട്ടത്.മഡൂറോയ്ക്ക് മയക്കുമരുന്ന് കടത്തുമായി ബന്ധമുള്ള ഈ സംഘടനയിൽ പങ്കാളിത്തമുണ്ടെന്ന് നേരത്തെതന്നെ യുഎസ് ആരോപിച്ചിരുന്നു.
കാർട്ടൽ ഡി ലോസ് സോൾസ് എന്ന സംഘടനയുമായി ബന്ധമുള്ളവരുടെ യുഎസിലെ ആസ്തികൾ മരവിപ്പിക്കാനും സാമ്പത്തിക ഇടപാടുകൾക്ക് കൂടുതൽ നിയന്ത്രണങ്ങൾ ഏർപ്പെടുത്താനും ഈ പ്രഖ്യാപനത്തിലൂടെ സാധിക്കും. എന്നാൽ, 'കാർട്ടൽ ഡി ലോസ് സോൾസ്' എന്നൊരു സംഘടന നിലവിലില്ലെന്നും ഇല്ലാത്ത ഒരു സംഘത്തെയാണ് യുഎസ് ലക്ഷ്യമിടുന്നതെന്നും വെനസ്വേലൻ സർക്കാർ ഇതിനോട് പ്രതികരിച്ചു. മഡൂറോയെ പിടികൂടാൻ സഹായിക്കുന്നവർക്ക് യുഎസ് നേരത്തെതന്നെ വലിയ തുക പാരിതോഷികം പ്രഖ്യാപിച്ചിരുന്നു. അമേരിക്കയും വെനസ്വേലയും തമ്മിൽ നിലനിൽക്കുന്ന രാഷ്ട്രീയ സംഘർഷം രൂക്ഷമാകുന്നതിനിടയിലാണ് ഈ പുതിയ നീക്കം.