തിരുവനന്തപുരം: വന്ദേഭാരത് എക്സ്പ്രസിന്റെ ഉദ്ഘാടന യാത്രയിൽ വിദ്യാർഥികളെക്കൊണ്ട് ആർഎസ്എസ് ഗണഗീതം ആലപിച്ച വിഷയത്തിൽ പ്രതികരണവുമായി വിദ്യാഭ്യാസ മന്ത്രി വി. ശിവൻകുട്ടി. 'ബലികുടീരങ്ങളെ…' പോലുള്ള എത്രയോ നല്ല ഗാനങ്ങൾ കേരളത്തിൽ ഉണ്ടെന്നും, എന്നാൽ അതൊന്നും ദേശഭക്തി ഗാനങ്ങൾ എന്ന പേരിൽ പൊതുവേദികളിൽ ആലപിക്കാൻ ആരും ആവശ്യപ്പെട്ടിട്ടില്ലല്ലോ എന്നും അദ്ദേഹം ചോദിച്ചു.
തൃശ്ശൂർ ഉൾപ്പെടെയുള്ള സ്റ്റേഷനുകളിൽ പുതിയ വന്ദേഭാരത് എക്സ്പ്രസിന്റെ ഫ്ലാഗ് ഓഫ് ചടങ്ങിനിടെയാണ് വിദ്യാർഥികൾ ആർഎസ്എസ് ഗണഗീതം ആലപിച്ചത്. ഇതിന്റെ വീഡിയോ ദക്ഷിണ റെയിൽവേ ഔദ്യോഗികമായി സമൂഹമാധ്യമങ്ങളിൽ പങ്കുവെക്കുകയും 'ദേശഭക്തി ഗാനം' എന്ന് വിശേഷിപ്പിക്കുകയും ചെയ്തത് വലിയ രാഷ്ട്രീയ വിവാദത്തിന് വഴിവെച്ചിരുന്നു.

നടന്നത് ഇന്ത്യൻ ഗവൺമെന്റിന്റെ ഔദ്യോഗിക പരിപാടിയാണെന്ന് മന്ത്രി ശിവൻകുട്ടി ചൂണ്ടിക്കാട്ടി. "കേരളത്തിന്റെ സാംസ്കാരിക പശ്ചാത്തലവും രാഷ്ട്രീയ ചരിത്രവും കണക്കിലെടുക്കുമ്പോൾ, ചില പ്രത്യേക സംഘടനകളുടെ ഗാനങ്ങൾ മാത്രം ദേശഭക്തി ഗാനങ്ങളായി അവതരിപ്പിക്കുന്നത് ശരിയായ നടപടിയല്ല. പൊതുവേദികളെ വർഗ്ഗീയ രാഷ്ട്രീയ പ്രചാരണങ്ങൾക്കായി ഉപയോഗിക്കാനുള്ള ശ്രമം അപലപനീയമാണ്," അദ്ദേഹം പറഞ്ഞു. വിവാദത്തെ തുടർന്ന് ദക്ഷിണ റെയിൽവേ ഔദ്യോഗിക പേജുകളിൽ നിന്ന് ഈ വീഡിയോ നീക്കം ചെയ്തിരുന്നു. വന്ദേഭാരത് പരിപാടിയിലെ ഗാനാലാപനവുമായി ബന്ധപ്പെട്ട് മുഖ്യമന്ത്രി പിണറായി വിജയനും നേരത്തെ വിമർശനമുന്നയിച്ചിരുന്നു.