ഹൈദരാബാദ്: ഉറുമ്പുകളോടുള്ള അമിതമായ ഭയം (മൈർമെകോഫോബിയ) കാരണം തെലങ്കാനയിലെ സംഗറെഡ്ഡി ജില്ലയിൽ 25 വയസ്സുള്ള യുവതി ജീവനൊടുക്കി. അമീൻപൂരിലെ വീട്ടിൽ നവംബർ നാലിനാണ് സംഭവം നടന്നത്. മഞ്ചേരിയൽ സ്വദേശിയായ മനിഷയാണ് ആത്മഹത്യ ചെയ്തത്. ഉറുമ്പുകളെ ഭയപ്പെട്ടിരുന്ന ഇവർ മുമ്പും ഇതിന് കൗൺസിലിംഗ് തേടിയിരുന്നതായി പോലീസ് അറിയിച്ചു.

നാല് വർഷം മുൻപ് വിവാഹിതയായ യുവതിക്ക് മൂന്ന് വയസ്സുള്ള ഒരു മകളുണ്ട്. നവംബർ നാലിന് രാവിലെ വീട് വൃത്തിയാക്കിയ ശേഷം കൂട്ടിക്കൊണ്ടു വരാമെന്ന് പറഞ്ഞ് യുവതി മകളെ ബന്ധുവീട്ടിലാക്കിയിരുന്നു. തുടർന്ന് ജോലിക്ക് പോയ ഭർത്താവ് ശ്രീകാന്ത് വൈകുന്നേരം തിരിച്ചെത്തിയപ്പോൾ വീടിന്റെ പ്രധാന വാതിൽ അകത്തു നിന്ന് പൂട്ടിയ നിലയിലായിരുന്നു. അയൽവാസികളുടെ സഹായത്തോടെ വാതിൽ തകർത്ത് അകത്ത് കടന്നപ്പോഴാണ് മനിഷയെ തൂങ്ങിമരിച്ച നിലയിൽ കണ്ടെത്തിയത്.

സംഭവസ്ഥലത്ത് നിന്ന് പോലീസ് ഒരു ആത്മഹത്യാ കുറിപ്പ് കണ്ടെടുത്തു. "ശ്രീ, എന്നോട് ക്ഷമിക്കണം, എനിക്ക് ഈ ഉറുമ്പുകളുടെ കൂടെ ജീവിക്കാൻ കഴിയില്ല. മകളെ ശ്രദ്ധിക്കണം. അന്നാവരം, തിരുപ്പതി എന്നിവിടങ്ങളിലെ കാണിക്കയായി 1,116 രൂപ നിക്ഷേപിക്കുകയും യെല്ലമ്മയ്ക്ക് വടി ബിയാം (അരി വഴിപാട്) നൽകാൻ മറക്കരുത്" എന്നും കുറിപ്പിൽ പറഞ്ഞിരുന്നു. വീട് വൃത്തിയാക്കുന്നതിനിടയിൽ ഉറുമ്പുകളെ കണ്ട ഭയമാണ് യുവതിയെ ഈ കടുംകൈ ചെയ്യാൻ പ്രേരിപ്പിച്ചതെന്നാണ് പ്രാഥമിക നിഗമനം. അമീൻപൂർ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.