ന്യൂയോർക്ക്: അമേരിക്കൻ രാഷ്ട്രീയത്തിൽ ചരിത്രം കുറിച്ച് ഡെമോക്രാറ്റിക് പാർട്ടി സ്ഥാനാർത്ഥി സൊഹ്‌റാൻ മംദാനി (34) ന്യൂയോർക്ക് സിറ്റി മേയർ തിരഞ്ഞെടുപ്പിൽ വിജയിച്ചു. ഇതോടെ, യുഎസിലെ ഏറ്റവും വലിയ നഗരമായ ന്യൂയോർക്ക് സിറ്റിയുടെ മേയർ പദവിയിലെത്തുന്ന ആദ്യ ഇന്ത്യൻ വംശജൻ എന്ന ബഹുമതി മംദാനിക്ക് സ്വന്തമായി.സ്വതന്ത്ര സ്ഥാനാർത്ഥിയായി മത്സരിച്ച മുൻ ന്യൂയോർക്ക് സ്റ്റേറ്റ് ഗവർണർ ആൻഡ്രൂ ക്വോമോയെ പരാജയപ്പെടുത്തിയാണ് ഡെമോക്രാറ്റിക് സോഷ്യലിസ്റ്റ് ചിന്താഗതിക്കാരനായ മംദാനി വിജയം നേടിയത്.

യുഎസ് പ്രസിഡന്റ് ഡോണൾഡ് ട്രംപിന്റെ കടുത്ത വിമർശകനാണ് സൊഹ്‌റാൻ മംദാനി. തിരഞ്ഞെടുപ്പ് വേളയിൽ മംദാനിക്കെതിരെ ട്രംപ് പരസ്യമായി രംഗത്തു വന്നിരുന്നു. സോഷ്യലിസ്റ്റ് ആശയങ്ങൾ പിന്തുടരുന്ന മംദാനിയെ "കമ്യൂണിസ്റ്റ് ഭ്രാന്തൻ" എന്ന് ട്രംപ് വിശേഷിപ്പിക്കുകയും ഇയാളെ പരാജയപ്പെടുത്തണമെന്ന് ആവശ്യപ്പെടുകയും ചെയ്തിരുന്നു. മംദാനിയുടെ വിജയം ട്രംപിന് കനത്ത തിരിച്ചടിയായാണ് വിലയിരുത്തപ്പെടുന്നത്.

പ്രശസ്ത ഇന്ത്യൻ സിനിമാ സംവിധായിക മീരാ നായരുടെയും ഉഗാണ്ടയിലെ ഇന്ത്യൻ വംശജനായ അക്കാദമിക് വിദഗ്ധൻ മഹ്മൂദ് മംദാനിയുടെയും മകനാണ് സൊഹ്‌റാൻ മംദാനി. ന്യൂയോർക്ക് സിറ്റിയുടെ ചരിത്രത്തിലെ ആദ്യ മുസ്ലിം മേയർ കൂടിയാണ് ഈ 34-കാരൻ.അമേരിക്കൻ രാഷ്ട്രീയത്തിലെ പുരോഗമനപരമായ നിലപാടുകളിലൂടെ ശ്രദ്ധേയനായ മംദാനിയുടെ വിജയം, യുഎസിലെ ഇന്ത്യൻ വംശജർക്ക് വലിയ അഭിമാനമായി മാറിയിരിക്കുകയാണ്.