ഡാളസ്: ലിറ്റററി അസോസിയേഷൻ ഓഫ് നോർത്ത് അമേരിക്കയുടെ (ലാന) ആഭിമുഖ്യത്തിൽ നടക്കുന്ന 14-ാമത് വൈജ്ഞാനിക സമ്മേളനത്തിന് ഡാളസിൽ തുടക്കമായി. രജിസ്ട്രേഷൻ, പരിചയം പുതുക്കൽ, ഉച്ചഭക്ഷണം എന്നിവയോടെയാണ് സമ്മേളനം ആരംഭിച്ചത്. വെള്ളിയാഴ്ച ഉച്ചയ്ക്ക് രണ്ടുമണിക്ക് ഡോ. എം.വി. പിള്ളയുടെ "കൈയെഴുത്തുകൾ: കാലം, വിചിത്രം, ചരിത്രവും ജീവിതകഥകളും" എന്ന വിഷയത്തിലുള്ള പ്രഭാഷണം നടന്നു. തുടർന്ന് സജി ഏബ്രഹാമിന്റെ "ചരിത്രകാരനായി വരൂ… ദാ, സാഹിത്യം വിളിക്കുന്നു" എന്ന പ്രഭാഷണവും ശ്രദ്ധേയമായി.
വൈകുന്നേരം 4.30 മുതൽ 5.45 വരെ നടന്ന "മഷി പൂണ്ട കവിതകൾ" എന്ന കവിതാവായനാ സെഷനിൽ ജെ.സി.ജെ, ടി.ജെ. ബിന്ദു, സന്തോഷ് പാലാ എന്നിവർ മോഡറേറ്റർമാരായി. ജോസ് ഒച്ചാലിൽ, ജോസൻ ജോർജ്, ജോസ് ചെറിയപ്പുറം, ഫ്രാൻസിസ് തോട്ടത്തിൽ, ഷാജു ജോൺ, അനൂപ ഡാനിയൽ, സിനി പണിക്കർ, ഉമ സജി, റഹിമാബി മൊയ്‌ദീൻ, ഗൗതം കൃഷ്ണ സജി, അനസ്വരം മാമ്പിള്ളി, ഉഷ നായർ, ഉമ ഹരിദാസ് തുടങ്ങിയവർ വിവിധ കവിതകളും കൃതികളും അവതരിപ്പിച്ചു.
സജി ഏബ്രഹാം ഉദ്ഘാടന പ്രസംഗം നടത്തുകയും പുസ്തക പ്രകാശനം നിർവഹിക്കുകയും ചെയ്തു. ആശംസാപ്രസംഗങ്ങൾക്കു ശേഷം നിർമല ജോസഫ് നന്ദി രേഖപ്പെടുത്തി. വൈജ്ഞാനിക സമ്മേളനത്തിന് കൺവെൻഷൻ കമ്മിറ്റി അധ്യക്ഷനായ ഷാജു ജോൺ സ്വാഗതം ആശംസിച്ചു. ലാന പ്രസിഡന്റ് ശങ്കർ മന അധ്യക്ഷത വഹിച്ച യോഗത്തിൽ, എം.എസ്.ടി. നമ്പൂതിരി, ഏബ്രഹാം തെക്കേമുറി, റിനി മമ്പലം, അജയകുമാർ ദിവാകരൻ, എം.ടി. വാസുദേവൻ നായർ, പ്രഫ. എം.കെ. സാനു എന്നിവർക്ക് ആദരാഞ്ജലികൾ അർപ്പിച്ച് ഹരിദാസ് തങ്കപ്പൻ പ്രസംഗിച്ചു.