ബംഗളൂരു: നഗരത്തിൽ ആംബുലൻസ് നിയന്ത്രണം വിട്ട് ട്രാഫിക് സിഗ്നലിൽ നിർത്തിയിട്ടിരുന്ന വാഹനങ്ങൾക്കിടയിലേക്ക് ഇടിച്ചു കയറി സ്കൂട്ടർ യാത്രികരായ ദമ്പതികൾ മരിച്ചു. ഇസ്മയിൽ (40), ഭാര്യ സമീൻ ബാനു (33) എന്നിവരാണ് മരിച്ചത്. അപകടത്തിൽ മറ്റു രണ്ട് പേർക്ക് ഗുരുതരമായി പരിക്കേറ്റിട്ടുണ്ട്. സംഭവത്തെത്തുടർന്ന് ആംബുലൻസ് ഡ്രൈവർ അശോകിനെ വിൽസൺ ഗാർഡൻ ട്രാഫിക് പോലീസ് കസ്റ്റഡിയിലെടുക്കുകയും കേസെടുക്കുകയും ചെയ്തിട്ടുണ്ട്. അപകടത്തിന്റെ ആഘാതത്തിൽ ഇരുവരും സംഭവസ്ഥലത്ത് വെച്ച് തന്നെ മരണപ്പെട്ടു.

ശനിയാഴ്ച രാത്രി 11 മണിയോടെ റിച്ച്മണ്ട് സർക്കിളിന് സമീപമാണ് ദാരുണമായ അപകടം നടന്നത്. അമിത വേഗതയിൽ വന്ന ആംബുലൻസ് റെഡ് സിഗ്നലിൽ നിർത്തിയിട്ടിരുന്ന മൂന്നോളം മോട്ടോർസൈക്കിളുകളിൽ ഇടിക്കുകയും, ഒരു ബൈക്കിനെ ഏതാനും മീറ്ററുകൾ വലിച്ചിഴച്ച ശേഷം സമീപത്തെ പോലീസ് ഔട്ട്‌പോസ്റ്റിൽ ഇടിച്ചു നിന്നാണ് അപകടം അവസാനിച്ചത്.അപകടകാരണം സംബന്ധിച്ച് പോലീസ് അന്വേഷണം പുരോഗമിക്കുകയാണ്.