അമേരിക്കയിൽ സർക്കാർ ഷട്ട്ഡൗൺ ഒരു മാസം പിന്നിടുകയാണ്. ഒക്ടോബർ 1-ന് തുടങ്ങിയ ഷട്ട്ഡൗൺ രണ്ടാം മാസത്തിലേക്ക് കടന്നതോടെ, ശമ്പളം കിട്ടാതെ വലയുന്ന ഫെഡറൽ ജീവനക്കാർ, അടിസ്ഥാന സേവനങ്ങൾ നിലച്ചതിനാൽ ദുരിതത്തിലായ ലക്ഷക്കണക്കിന് അമേരിക്കക്കാർ എന്നിങ്ങനെ നിരവധി പേരാണ് ദുരിതത്തിലായിരിക്കുന്നത്. ഇതിനിടെ ദശലക്ഷക്കണക്കിന് പൗരന്മാർക്ക് പ്രതിമാസ ഭക്ഷ്യസഹായം മുടങ്ങുമെന്ന ആശങ്കയാണ് ഉയര്ന്നുവരുന്നത്.

ഏകദേശം 4.2 കോടി ആളുകൾക്ക് ലഭിക്കുന്ന സപ്ലിമെന്റൽ ന്യൂട്രീഷൻ അസിസ്റ്റൻസ് പ്രോഗ്രാമിന്റെ (SNAP - സ്നാപ്) ആനുകൂല്യമാണ് നവംബർ 1 മുതൽ നിലയ്ക്കുന്ന സാഹചര്യത്തിലായിരിക്കുന്നത്. എന്നാൽ ആരും വിശന്നിരിക്കേണ്ടി വരില്ലെന്നാണ് പ്രസിഡന്റ് ഡൊണാൾഡ് ട്രംപ് ഉറപ്പുനൽകുന്നത്. ആരും പട്ടിണി കിടക്കാൻ താൻ ആഗ്രഹിക്കുന്നില്ലെന്നും, ധനസഹായം തുടരാൻ നിയമപരമായ വഴികൾ തേടാൻ ഉദ്യോഗസ്ഥരോട് ആവശ്യപ്പെട്ടിട്ടുണ്ടെന്നും അദ്ദേഹം വ്യക്തമാക്കി.

എന്നാൽ, സ്നാപ് ഫണ്ട് മുടങ്ങാതിരിക്കാൻ അടിയന്തര സഹായനിധി ഉപയോഗിക്കണമെന്ന് റോഡ് ഐലൻഡിലെ ഒരു ഫെഡറൽ ജഡ്ജി ഉത്തരവിട്ടെങ്കിലും, ഈ ഫണ്ട് ഉപയോഗിക്കാൻ നിയമപരമായി കഴിയില്ല എന്ന നിലപാടിലാണ് ട്രംപ് ഭരണകൂടം. ഇത് ആനുകൂല്യങ്ങൾ ലഭിക്കേണ്ടവരിൽ വലിയ ആശങ്ക സൃഷ്ടിക്കുന്നു. റിപ്പബ്ലിക്കൻമാരും ഡെമോക്രാറ്റുകളും പരസ്പരം പഴിചാരി മുന്നോട്ടുപോകുമ്പോൾ, ഈ വാരാന്ത്യം മുതൽ ഷട്ട്ഡൗണിന്റെ പൂർണ്ണ പ്രഹരം സാധാരണക്കാർക്ക് നേരിടേണ്ടിവരുമെന്നാണ് റിപ്പോർട്ടുകൾ.