തിരുവനന്തപുരം: ഒളിമ്പിക്സിൽ മെഡൽ നേടുന്ന ആദ്യ മലയാളിയും ഹോക്കി താരവുമായ മാനുവൽ ഫ്രെഡറിക് അന്തരിച്ചു. കണ്ണൂർ സ്വദേശിയായ ഇദ്ദേഹത്തിന്റെ അന്ത്യം 78-ാം വയസ്സിൽ ബംഗളൂരുവിൽ ചികിത്സയിൽ കഴിയവെയായിരുന്നു. 1972-ലെ മ്യൂണിക് ഒളിമ്പിക്സിൽ ഇന്ത്യൻ ഹോക്കി ടീമിനൊപ്പം വെങ്കല മെഡൽ സ്വന്തമാക്കിയ മാനുവൽ ഫ്രെഡറിക്, ഏഴു വർഷക്കാലത്തോളം ഇന്ത്യൻ ഹോക്കി ടീമിന്റെ ഗോൾകീപ്പറായും പ്രവർത്തിച്ചിട്ടുണ്ട്.

2019-ലെ ധ്യാൻ ചന്ദ് അവാർഡ് ജേതാവ് കൂടിയായ മാനുവലിനെ 'ഇന്ത്യൻ ടൈഗർ' എന്നാണ് ഹോക്കി ലോകം വിശേഷിപ്പിച്ചിരുന്നത്; ഹെൽമറ്റ് പോലും ഉപയോഗിക്കാതെ നെറ്റ് പോലെ ബോളുകൾ തടഞ്ഞിട്ടതാണ് ഈ വിശേഷണത്തിന് കാരണം. പന്ത്രണ്ടാം വയസ്സിൽ കളി തുടങ്ങിയ അദ്ദേഹം ഇന്ത്യൻ ജേഴ്സിയിൽ കളിക്കണമെന്ന ലക്ഷ്യത്തോടെ പരിശീലനം ആരംഭിച്ചു, കണ്ണൂർ ബി.എം. സ്കൂളിലെ ഫുട്ബോൾ ടീമിൽ നിന്നാണ് സെൻറ് മൈക്കിൾസ് സ്കൂൾ ടീം വഴി ഹോക്കിയിൽ സജീവമായത്.