ബംഗളൂരു: ബംഗളൂരുവിൽ ദമ്പതികളുടെ അതിക്രൂരതയിൽ 24 വയസ്സുള്ള ഡെലിവറി ബോയിക്ക് ദാരുണാന്ത്യം. അബദ്ധത്തിൽ കാറിൽ തട്ടിയതിന്റെ പേരിൽ ഫുഡ് പാർസലുമായി പോവുകയായിരുന്ന ചെമ്പട്ടല്ലി സ്വദേശിയായ ദർശനെയാണ് മലയാളി കളരിപ്പയറ്റ് പരിശീലകനും ഭാര്യയും ചേർന്ന് പിന്തുടർന്ന് മനപ്പൂർവ്വം കാറിടിപ്പിച്ചു കൊലപ്പെടുത്തിയത്. ഒക്ടോബർ 25-ന് നടന്ന സംഭവത്തിന്റെ ഞെട്ടിക്കുന്ന സിസിടിവി ദൃശ്യങ്ങൾ പുറത്തുവന്നു. മലപ്പുറം സ്വദേശിയായ മനോജ് കുമാർ (32), ജമ്മു കാശ്മീർ സ്വദേശിനിയായ ഭാര്യ ആരതി ശർമ്മ (32) എന്നിവരെ പോലീസ് അറസ്റ്റ് ചെയ്തു.

ഇരുവരേയും 14 ദിവസത്തെ ജുഡീഷ്യൽ കസ്റ്റഡിയിൽ വിട്ടു. അഞ്ചു വർഷം മുമ്പാണ് ഇരുവരും വിവാഹിതരായത്.സംഭവം നടന്നത് രാത്രി 9 മണിയോടെയാണ്. ഡെലിവറി ബോയിയായ ദർശൻ ഓടിച്ച ഗിയർലെസ് സ്കൂട്ടർ അബദ്ധത്തിൽ ഇവരുടെ കാറിൽ തട്ടി ചെറിയ കേടുപാടുകൾ വരുത്തി. ഭക്ഷണം എത്തിക്കുന്ന തിരക്കിലായിരുന്ന ദർശൻ ഉടൻതന്നെ അവരോട് ക്ഷമാപണം നടത്തുകയും വേഗത്തിൽ അവിടെ നിന്ന് പോവുകയും ചെയ്തു. എന്നാൽ, ഇതിൽ പ്രകോപിതനായ മനോജ് കുമാർ ദേഷ്യം നിയന്ത്രിക്കാൻ കഴിയാതെ യുവാവിനെ കാറിൽ പിന്തുടരുകയും മനഃപൂർവം കാറിടിപ്പിച്ച് തെറിപ്പിക്കുകയുമായിരുന്നു.