അംബാല: യു.എസിൽ അനധികൃത കുടിയേറ്റക്കാരായി എത്തിയ 50 ഇന്ത്യക്കാരെക്കൂടി യു.എസ്. അധികൃതർ നാടുകടത്തി. നാടുകടത്തപ്പെട്ട ഏറ്റവും പുതിയ സംഘത്തിൽ ഉൾപ്പെട്ടവർ ഹരിയാന സ്വദേശികളാണ്. ഇന്ത്യയിലേക്ക് നാടുകടത്തുന്ന വിമാനയാത്രയിൽ പലർക്കും 25 മണിക്കൂർ വരെ കാലിൽ ചങ്ങല ധരിക്കേണ്ടിവന്നതായി പരാതിയുണ്ട്. 25 വയസ്സിനും 40 വയസ്സിനും ഇടയിൽ പ്രായമുള്ളവരാണ് സംഘത്തിലേറെയും. ഹരിയാനയിലെ കർണാൽ, അംബാല, കുരുക്ഷേത്ര, യമുനാനഗർ, പാനിപ്പത്ത്, കൈത്തൽ, ജിന്ദ് എന്നീ ജില്ലകളിൽ നിന്നുള്ളവരാണ് നാടുകടത്തപ്പെട്ടവർ.

35 ലക്ഷം മുതൽ 57 ലക്ഷം രൂപ വരെ ഏജൻ്റുമാർക്ക് നൽകി കബളിപ്പിക്കപ്പെട്ടവരാണ് ഇവരിൽ പലരും. ഇവർ ശനിയാഴ്ച രാത്രി ഡൽഹിയിൽ വിമാനമിറങ്ങി.നിയമനടപടികൾ പൂർത്തിയാക്കിയ ശേഷം ഇവരെ വീടുകളിലേക്ക് അയച്ചതായി അധികൃതർ അറിയിച്ചു. ഈ വർഷം ആദ്യം, യു.എസ്. അധികൃതർ പഞ്ചാബ്, ഹരിയാന, ഗുജറാത്ത് എന്നിവിടങ്ങളിൽ നിന്നുള്ള നിരവധി യുവാക്കളെ നാടുകടത്തിയിരുന്നു. ജനുവരിയിൽ ഡൊണാൾഡ് ട്രംപ് യു.എസ്. പ്രസിഡൻ്റായി അധികാരമേറ്റ ശേഷം, രാജ്യത്തെ നിയമ നിർവ്വഹണ ഏജൻസികൾ അനധികൃത കുടിയേറ്റക്കാർക്കെതിരെ കടുത്ത നടപടികൾ ആരംഭിച്ചിരുന്നു.