മലേഷ്യ: മലേഷ്യൻ തലസ്ഥാനത്ത് ആവേശകരമായ വരവറിയിച്ച് യുഎസ് പ്രസിഡന്റ് ഡൊണാൾഡ് ട്രംപ്. 23 മണിക്കൂർ നീണ്ട വിമാനയാത്രയ്ക്ക് ശേഷം മലേഷ്യയിലെത്തിയ ട്രംപ് നൃത്തച്ചുവടുകളോടെയാണ് തന്റെ വരവറിയിച്ചത്. റാപ്പിഡ് റെസ്‌പോൺസ് 47 പങ്കിട്ട ഒരു വീഡിയോയിൽ, 79-കാരനായ ട്രംപ് എയർഫോഴ്‌സ് വണ്ണിന് സമീപമുള്ള വിമാനത്താവളത്തിലെ ടാർമാക്കിൽ ഡ്രമ്മിന്റെ താളത്തിനൊത്ത് നൃത്തം ചെയ്യുന്ന ദൃശ്യങ്ങളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. പ്രസിഡൻ്റിൻ്റെ ഊർജ്ജസ്വലമായ ഈ നീക്കങ്ങൾ അദ്ദേഹത്തെ സ്വീകരിക്കാനെത്തിയവരിൽ പുഞ്ചിരി പടർത്തി.
മലേഷ്യയിലെ പ്രധാന വംശീയ വിഭാഗങ്ങളായ ബോർണിയോ തദ്ദേശീയർ, മലായ് വംശജർ, ചൈനക്കാർ, ഇന്ത്യക്കാർ എന്നിവരെ പ്രതിനിധീകരിക്കുന്ന വർണ്ണാഭമായ വസ്ത്രങ്ങൾ ധരിച്ച നർത്തകർക്കൊപ്പമാണ് ട്രംപ് നൃത്തം ചെയ്തത്. മലേഷ്യൻ പ്രധാനമന്ത്രി അൻവർ ഇബ്രാഹിമും പ്രസിഡന്റിനൊപ്പം ചേർന്ന് സംഗീതത്തിൽ ആടുന്നതും സോഷ്യൽമീഡിയയിൽ പ്രചരിക്കുന്ന വീഡിയോയിൽ കാണാം.
അതേസമയം ഏഷ്യയിലെ അമേരിക്കയുടെ സാന്നിധ്യം വിപുലീകരിക്കുന്നതിനും വ്യാപാര ബന്ധം ശക്തിപ്പെടുത്തുന്നതിനുമുള്ള അഞ്ച് ദിവസത്തെ ദൗത്യത്തിന്റെ ഭാഗമാണ് ട്രംപിന്റെ മലേഷ്യൻ സന്ദർശനം. പുതുതായി തിരഞ്ഞെടുക്കപ്പെട്ട ജാപ്പനീസ് നേതാവ് സനാവോ തകായിച്ചിയെ ടോക്കിയോയിലും ചൈനീസ് പ്രസിഡന്റ് ഷി ജിൻപിങ്ങിനെ ദക്ഷിണ കൊറിയയിലും കാണുന്നതും അദ്ദേഹത്തിന്റെ പദ്ധതികളിൽ ഉൾപ്പെടുന്നു. സൈനികരഹിത മേഖലയ്ക്ക് സമീപം ഉത്തരകൊറിയയുടെ കിം ജോങ് ഉന്നുമായി അവസാന നിമിഷം കൂടിക്കാഴ്ച നടത്താനും സാധ്യതയുണ്ട്.