പത്തനംതിട്ട: ശബരിമല സ്വർണക്കൊള്ളക്കേസുമായി ബന്ധപ്പെട്ട് മുൻ അഡ്മിനിസ്‌ട്രേറ്റീവ് ഓഫീസർ മുരാരി ബാബു അറസ്റ്റിൽ.അന്വേഷണ ഉദ്യോഗസ്ഥനായ എസ്.പി. ശശിധരനാണ് മുരാരി ബാബുവിനെ അറസ്റ്റ് ചെയ്തത്. റാന്നി കോടതിയിൽ ഹാജരാക്കിയ ശേഷം ഇയാളെ വിശദമായി ചോദ്യം ചെയ്യും. 2019 മുതൽ 2024 വരെയുള്ള കാലയളവിലെ സ്വർണപാളികളും കട്ടിളപ്പാളികളും കൊണ്ടുപോയ സംഭവത്തിലാണ് അറസ്റ്റ്.ദ്വാരപാലക ശിൽപ്പങ്ങളിലെ സ്വർണം മോഷ്ടിച്ച കേസിലെ രണ്ടാം പ്രതിയാണ് ഇയാൾ. സ്വർണക്കൊള്ളയിൽ അറസ്റ്റിലാകുന്ന ആദ്യ ദേവസ്വം ബോർഡ് ഉദ്യോഗസ്ഥനാണ് മുരാരി ബാബു.

ഇന്നലെ രാത്രി പെരുന്നയിലെ വീട്ടിൽ നിന്ന് കസ്റ്റഡിയിലെടുത്ത ഇയാളെ തിരുവനന്തപുരത്ത് എത്തിച്ചിരുന്നു. വിവാദങ്ങളെത്തുടർന്ന് മുരാരി ബാബുവിനെ ദേവസ്വം ബോർഡ് സസ്‌പെൻഡ് ചെയ്തിരുന്നു. 1998-ൽ സ്വർണം പൂശിയ ദ്വാരപാലക ശിൽപ്പങ്ങളെക്കുറിച്ച്, 2019-ൽ ചെമ്പ് പൊതിഞ്ഞതാണെന്ന് മഹസറിൽ എഴുതിയത് ഇദ്ദേഹമാണ്. വ്യാജരേഖ ചമച്ചതിന്‍റെ തുടക്കം മുരാരി ബാബുവിന്‍റെ കാലത്താണ് എന്നാണ് റിപ്പോർട്ട്.