വാഷിങ്ടണ്‍: തെക്കൻ കാലിഫോർണിയയിൽ മൂന്ന് പേരുടെ മരണത്തിനിടയാക്കിയ വാഹനാപകടത്തിൽ അനധികൃത കുടിയേറ്റക്കാരനായ ജഷൻപ്രീത് സിങ് (21) എന്ന ഇന്ത്യക്കാരൻ പിടിയിൽ. സാന്‍ ബര്‍ണാര്‍ഡിനോ കൗണ്ടി ഫ്രീവേയിൽ വാഹനങ്ങളിലേക്ക് ട്രക്ക് ഇടിച്ചുകയറിയാണ് അപകടമുണ്ടായത്. വാഹനം ഓടിക്കുമ്പോൾ ഇയാൾ ലഹരി ഉപയോഗിച്ചിരുന്നതായാണ് സൂചന. ഇയാൾ ഓടിച്ചിരുന്ന ട്രക്ക് ഒരു എസ്‌യുവിയിലേക്കും തുടർന്ന് തൊട്ടുമുന്നിലെ വാഹനത്തിലേക്കും ഇടിച്ചുകയറുകയായിരുന്നു. അപകടത്തിൽ മരിച്ച മൂന്നുപേരുടെ വിവരങ്ങൾ ഇതുവരെ പുറത്തുവിട്ടിട്ടില്ല.
2022-ലാണ് ജഷൻപ്രീത് സിങ് അമേരിക്കയിലേക്ക് അനധികൃത കുടിയേറിയത്. രാജ്യത്തിൻ്റെ തെക്കൻ അതിർത്തി കടന്നെത്തിയ ജഷൻപ്രീത് സിങിനെ കാലിഫോർണിയയിലെ എൽ സെൻട്രോ സെക്ടറിൽവെച്ച് അതിർത്തി രക്ഷാസേന പിടികൂടിയിരുന്നു. വിചാരണ തീർപ്പാക്കുന്നതുവരെ അനധികൃത കുടിയേറ്റക്കാരെ വിട്ടയക്കുന്ന 'തടങ്കലിന് ബദൽ' എന്ന ബൈഡൻ ഭരണകൂടത്തിൻ്റെ നയപ്രകാരം ഇയാളെ അന്ന് വിട്ടയച്ചു. ഗതാഗതക്കുരുക്കിലേക്ക് കയറുന്നതിന് മുമ്പ് സിങ് ബ്രേക്ക് ചവിട്ടിയിരുന്നില്ലെന്നും, ഇയാൾ ലഹരിയുടെ സ്വാധീനത്തിലായിരുന്നുവെന്നും പോലീസ് അറിയിച്ചു. ടോക്സിക്കോളജി പരിശോധനയിൽ ലഹരി ഉപയോഗം സ്ഥിരീകരിച്ചതായും പോലീസ് വ്യക്തമാക്കി.