മുംബൈ: നവിമുംബൈയിലെ വാഷിയിൽ അപ്പാർട്മെന്റ് കോംപ്ലക്സിൽ ഉണ്ടായ തീപിടിത്തത്തിൽ 6 പേർ മരിച്ചു. മരിച്ചവരിൽ 3 മലയാളികളും ഉണ്ട്. തിരുവനന്തപുരം സ്വദേശികളാണ് മരിച്ചത്. സുന്ദർ ബാലകൃഷ്ണൻ (44), പൂജ രാജൻ(39) മകൾ ആറു വയസ്സുള്ള വേദിക സുന്ദർ ബാലകൃഷ്ണൻ എന്നിവരാണ് മരിച്ചത്. വാഷിയിലെ സെക്ടർ 17ലെ എംജി കോംപ്ലക്സിലെ റഹേജ റസിഡൻസിയുടെ ബി വിങ്ങിലാണു തീപിടിത്തമുണ്ടായത്. പുലർച്ചെ 12.40നാണ് സംഭവം ഉണ്ടായത്. ഷോർട് സർക്ക്യൂട്ട് ആണ് തീപ്പിടുത്തത്തിന്റെ കാരണം എന്നാണ് സൂചന.

അപ്പാർട്മെന്റിന്റെ 10, 11, 12 നിലകളിലാണ് തീപിടിത്തം ഉണ്ടായത്. 10ാം നിലയിലാണ് ആദ്യം തീപിടിച്ചത്. പിന്നീട് അത് മുകളിലെ നിലയിലേക്ക് പടരുകയാണ്. ആറുവയസ്സുകാരി 12ാം നിലയിലായിരുന്നു കിടന്നത്. പുലർച്ചെ നാലുമണിയോടെ തീയണയ്ക്കാൻ സാധിച്ചത്. കമല ഹിരാൽ ജെയിൻ(84) ആണ് മരിച്ച നാലാമത്തെയാൾ. പരുക്കേറ്റവരെ ആശുപത്രിയിൽ പ്രവേശിപ്പിച്ചു. തിങ്കളാഴ്ച മുംബൈയിലെ കഫെ പരേഡ് മേഖലയിൽ ഉണ്ടായ തീപിടിത്തത്തിൽ 15 വയസ്സുകാരൻ കൊല്ലപ്പെടുകയും മൂന്നുപേർക്ക് പരുക്കേൽക്കുകയും ചെയ്തിരുന്നു.