വാഷിങ്ടണ്‍: വീണ്ടും ഭീഷണിയുമായി ട്രംപ്. റഷ്യയില്‍ നിന്ന് എണ്ണ ഇറക്കുമതി ചെയ്യുന്നത് തുടര്‍ന്നാല്‍ ഇന്ത്യയ്ക്കുമേൽ ഇനിയും തീരുവ ചുമത്തുമെന്നാണ് ഭീഷണി. റഷ്യയില്‍ നിന്നുള്ള ക്രൂഡ് ഓയില്‍ ഇറക്കുമതി നിര്‍ത്തുമെന്ന് പ്രധാനമന്ത്രി നരേന്ദ്ര മോദി തനിക്ക് ഉറപ്പ് നല്‍കിയതായി ട്രംപ് പ്രചാരണം നടത്തിയിരുന്നു. എന്നാൽ പിന്നാലെ ഇന്ത്യ ട്രംപിന്റെ വാദം തള്ളുകയും ചെയ്തിരുന്നു. ഇതിന് പിന്നാലെയാണ് ഭീഷണിയുമായി ട്രംപ് വീണ്ടും ഇറങ്ങിയിരിക്കുന്നത്. അങ്ങനെയെങ്കില്‍ ഇന്ത്യയ്‌ക്കെതിരെ ചുമത്തിയ വന്‍ തോതിലുള്ള താരിഫുകള്‍ തുടരുമെന്നാണ് ട്രംപിന്റെ മുന്നറിയിപ്പ്.
റഷ്യയിൽ നിന്നുള്ള എണ്ണ ഇറക്കുമതി ഇന്ത്യ പകുതിയായി കുറച്ചെന്ന വൈറ്റ് ഹൗസ് ഉദ്യോഗസ്ഥൻ്റെ വ്യാഴാഴ്ചത്തെ അവകാശവാദം തെറ്റാണെന്ന് റിപ്പോർട്ട്. ഈ അവകാശവാദം തള്ളി, ഇന്ത്യയുടെ റഷ്യൻ എണ്ണ ഇറക്കുമതി ഈ മാസം ഏകദേശം 20 ശതമാനം വർധിച്ച് പ്രതിദിനം 19 ലക്ഷം ബാരലായി ഉയരുമെന്ന് കമ്മോഡിറ്റി ഡാറ്റാ സ്ഥാപനമായ കെപ്ലറിനെ ഉദ്ധരിച്ച് റോയിട്ടേഴ്‌സ് റിപ്പോർട്ട് ചെയ്തു.
റഷ്യയുമായി വ്യാപാരം നടത്തുന്ന രാജ്യങ്ങളിൽ സമ്മർദ്ദം ചെലുത്താനുള്ള യുഎസിൻ്റെ ശ്രമങ്ങളുടെ ഭാഗമാണ് ഇന്ത്യയ്ക്ക് ട്രംപ് നൽകിയ മുന്നറിയിപ്പ്. അതേസമയം, റഷ്യയിൽ നിന്നുള്ള ഇറക്കുമതി സംബന്ധിച്ച് പ്രതികരിക്കവെ, രാജ്യത്തെ ഉപഭോക്താക്കളുടെ താൽപ്പര്യങ്ങൾ സംരക്ഷിക്കുകയാണ് ലക്ഷ്യമെന്ന് കേന്ദ്രസർക്കാർ വ്യക്തമാക്കിയിരുന്നു.