തിരുവനന്തപുരം: നെയ്യാറ്റിന്‍കരയിൽ ബേക്കറി ഉടമയായ സ്ത്രീ ജീവനൊടുക്കിയ സംഭവത്തില്‍ കോണ്‍ഗ്രസ് നേതാവിനെ പാർട്ടിയിൽ നിന്നും സസ്പൻഡ് ചെയ്തു. തിരുവനന്തപുരം ഡിസിസി ജനറല്‍ സെക്രട്ടറിയും നെയ്യാറ്റിന്‍കര നഗരസഭാ കൗണ്‍സിലറുമായ ജോസ് ഫ്രാങ്ക്‌ളിനെതിരെയാണ് നടപടി. ആത്മഹത്യാക്കുറിപ്പില്‍ ഇയാള്‍ക്കെതിരെ ഉയര്‍ന്ന ആരോപണങ്ങളുടെ പശ്ചത്താലത്തിലാണ് സസ്പൻഡ് ചെയ്തത്. കെപിസിസി അധ്യക്ഷന്‍ സണ്ണി ജോസഫ് എംഎല്‍എയാണ് ജോസ് ഫ്രാങ്ക്‌ളിനെ സസ്‌പെന്‍ഡ് ചെയ്ത വിവരം അറിയിച്ചത്.
ജോസ് ഫ്രാങ്ക്ളിൻ തന്നെ നിരന്തരം ലൈംഗികമായി ശല്യം ചെയ്‌തിരുന്നുവെന്നും മറ്റുവഴികളില്ലാതെയാണ് ജീവനൊടുക്കുന്നതെന്നും ആത്മഹത്യാക്കുറിപ്പിൽ സ്ത്രീ ആരോപിച്ചിരുന്നു. കഴിഞ്ഞ എട്ടാം തീയതിയാണ് സംഭവം. നെയ്യാറ്റിന്‍കര സ്വദേശി ഗ്യാസ് പൊട്ടിത്തെറിച്ച് മരിക്കുകയായിരുന്നു. അപകടമരണമാണെന്നാണ് ആദ്യം കരുതിയെങ്കിലും, പിന്നീട് ആത്മഹത്യാ കുറിപ്പ് കണ്ടെടുത്തതോടെയാണ് ജീവനൊടുക്കിയതാണെന്ന് സ്ഥിരീകരിച്ചത്. മക്കള്‍ക്ക് എഴുതിയതെന്ന് കരുതുന്ന നാല് പേജുള്ള ആത്മഹത്യാക്കുറിപ്പാണ് ലഭിച്ചത്.
നാല് മാസം മുന്‍പാണ് സ്ത്രീ ബേക്കറി ആരംഭിച്ചത്. ഇതിനായി വായ്പ ശരിയാക്കി തരാം എന്നുപറഞ്ഞ് ജോസ് ഫ്രാങ്ക്‌ളിന്‍ സ്ത്രീയെ ഓഫീസിലേക്ക് വിളിച്ചു വരുത്തി ലൈംഗികമായി ഉപദ്രവിച്ചു എന്നാണ് ആത്മഹത്യാക്കുറിപ്പിലെ പ്രധാന ആരോപണം. വായ്പ അനുവദിക്കണമെങ്കിൽ തനിക്ക് വഴങ്ങണമെന്നാവശ്യപ്പെട്ട് ജോസ് ഫ്രാങ്ക്ളിൻ സ്ത്രീയെ നിരന്തരം കടയിലെത്തി ശല്യപ്പെടുത്തിയിരുന്നതായും കുറിപ്പിലുണ്ട്. സ്ത്രീക്ക് ഭർത്താവില്ല.