ശബരിമല ദർശനത്തിന് എത്തുന്ന രാഷ്ട്രപതി ദ്രൗപതി മുർമുവിനെ പമ്പയിൽ നിന്ന് സന്നിധാനത്തേക്ക് എത്തിക്കുന്ന ക്രമീകരണങ്ങൾ തിരുവിതാംകൂർ ദേവസ്വം ബോർഡ് ഹൈക്കോടതിയെ അറിയിച്ചു. തുലാമാസ പൂജയുടെ അവസാന ദിവസമാണ് രാഷ്ട്രപതിയുടെ സന്ദർശനം. അന്ന് ദർശനത്തിന് നിയന്ത്രണമുണ്ടാകും.പുതിയ ഗൂർഖ ഓഫ് റോഡ് വാഹനത്തിലായിരിക്കും രാഷ്ട്രപതി മല കയറുക. ആറ് വാഹനങ്ങൾ വാഹനവ്യൂഹത്തിൽ ഉണ്ടാകും. ഓഫ് റോഡ് വാഹനങ്ങളുടെ ട്രയൽ റൺ ഉടൻ നടത്തും.

ഒക്ടോബർ 22-നാണ് രാഷ്ട്രപതി ശബരിമലയിൽ എത്തുന്നത്. സ്വാമി അയ്യപ്പൻ റോഡ് വഴി മരക്കൂട്ടത്ത് എത്തിയ ശേഷം പരമ്പരാഗത പാതയിലൂടെ വാഹനവ്യൂഹം സന്നിധാനത്ത് എത്തും.തിരുവനന്തപുരത്ത് നിന്ന് രാവിലെ 9.25-ന് ഹെലികോപ്റ്ററിൽ നിലയ്ക്കലിലേക്ക് തിരിക്കും. 11.00-ന് പമ്പയിൽ എത്തി വാഹനത്തിൽ ശബരിമലയിലേക്ക് പോകാനാണ് നിശ്ചയിച്ചിരിക്കുന്നത്. ക്ഷേത്ര ദർശനത്തിനുശേഷം ശബരിമല ഗസ്റ്റ് ഹൗസിൽ ഉച്ചഭക്ഷണം കഴിച്ച് വിശ്രമിച്ച ശേഷം വൈകുന്നേരം 4.20-ന് ഹെലികോപ്റ്ററിൽ തിരുവനന്തപുരത്തേക്ക് മടങ്ങും.

അതേസമയം ശബരിമലയിലെ എല്ലാ ആചാര അനുഷ്ഠാനങ്ങളും പാലിക്കുമെന്നും രാഷ്ട്രപതിയുടെ ദർശന വിവരങ്ങൾ തന്ത്രിയെ അറിയിച്ചിട്ടുണ്ടെന്നും ബോർഡ് ദേവസ്വം ബെഞ്ചിനെ അറിയിച്ചു.തുലാമാസ പൂജകൾക്കായി ശബരിമല നട ഒക്ടോബർ 17-ന് തുറക്കും. ശബരിമല, മാളികപ്പുറം മേൽശാന്തിമാരെ തിരഞ്ഞെടുക്കുന്നതിനുള്ള നറുക്കെടുപ്പ് തുലാമാസം ഒന്നിന് രാവിലെ സന്നിധാനത്ത് നടക്കും.