കോഴിക്കോട്: മാനസികാരോഗ്യത്തെക്കുറിച്ച് വിവാദപരമായ പരാമർശം നടത്തിയ സംഭവത്തിൽ നടി കൃഷ്ണ പ്രഭയ്ക്കെതിരെ മുഖ്യമന്ത്രിക്ക് പരാതി നൽകി. നടി വിഷാദരോഗത്തെ നിസ്സാരവൽക്കരിച്ചു എന്ന ആരോപിച്ചാണ് മുഖ്യമന്ത്രിക്ക് പരാതി നൽകിയത്. തൃശ്ശൂർ കൈപ്പമംഗലം സ്വദേശി ധനഞ്ജയ് ആണ് പരാതി നൽകിയത്. പഴയ വട്ടാണ് ഇപ്പോഴത്തെ ഡിപ്രഷൻ എന്നും. ഒരു പണിയും ഇല്ലാത്തവർക്കാണ് ഈ പ്രശ്നങ്ങളൊക്കെ എന്നും, ഡിപ്രഷൻ മൂഡ് സ്വിങ്സ് എന്നൊക്കെ ഇപ്പോൾ ഇതിന് കുറേ ഓമനപ്പേരുണ്ട് എന്നുമായിരുന്നു കൃഷ്ണപ്രഭയുടെ പരാമർശം.

ഒരു യൂട്യൂബ് ചാനലിന് നൽകിയ അഭിമുഖത്തിൽ ആയിരുന്നു നടിയുടെ അഭിപ്രായ പ്രകടനം. ഇതിനെതിരെ വലിയ രീതിയിലുള്ള വിമർശനങ്ങളാണ് ഉയർന്നുവന്നത്. മാനസികാരോഗ്യ പ്രശ്നമുള്ളവരെ കൂടുതൽ ഒറ്റപ്പെടുത്താനും ചികിത്സ തേടുന്നതിൽ നിന്ന് പിന്തിരിപ്പിക്കാനും സാധ്യതയുള്ള അശാസ്ത്രീയമായ പ്രസ്താവനയാണ് നടി നടത്തിയത് എന്നും, പൊതുസമൂഹത്തിൽ വലിയ സ്വാധീനമുള്ള വ്യക്തിയിൽ നിന്നും ഇത്തരം പരാമർശങ്ങൾ വന്നത് അതീവ ഗൗരവത്തോടെ കാണണമെന്നും ആണ് പരാതി. വിവാദപരമായ പരാമർശങ്ങൾ ഉൾപ്പെട്ട വീഡിയോ ഉടൻതന്നെ സോഷ്യൽ മീഡിയയിൽ നിന്നും നീക്കം ചെയ്യാൻ സർക്കാർ ഇടപെടൽ ഉണ്ടാകണമെന്നും പരാതിയിൽ പറയുന്നു. കൂടാതെ നടി പൊതുജനങ്ങളോട് തന്റെ പരാമർശങ്ങളുടെ പേരിൽ നിരുപാധികം ക്ഷമ ചോദിക്കുകയും മാനസികാരോഗ്യത്തെക്കുറിച്ച് ശരിയായ അവബോധം നൽകുകയും ചെയ്യാനുള്ള നടപടി സർക്കാർ സ്വീകരിക്കണമെന്നും പരാതി.