വാഷിങ്ടൻ: യു.എസ്. പ്രസിഡന്റ് ഡൊണാള്‍ഡ് ട്രംപിന്റെ കര്‍ശനമായ കുടിയേറ്റ വിരുദ്ധ നയങ്ങള്‍ കാരണം യു.എസിലേക്കുള്ള ഇന്ത്യൻ വിദ്യാർത്ഥി വിസകളുടെ എണ്ണത്തിൽ താരതമ്യേന ​ഗണ്യമായ കുറവുണ്ടായതായി റിപ്പോർട്ട്. ഓഗസ്റ്റ് മാസത്തിൽ വിദ്യാർത്ഥി വിസ അനുവദിച്ചതിൽ 20 ശതമാനത്തോളം കുറവാണ് രേഖപ്പെടുത്തിയത്. ഇതിൽ ഏറ്റവും വലിയ ഇടിവ് സംഭവിച്ചത് ഇന്ത്യയ്ക്കാണ്. ഇന്റർനാഷണൽ ട്രേഡ് കമ്മീഷന്റെ കണക്കുകൾ പ്രകാരം, വിദ്യാർത്ഥി വിസകളുടെ എണ്ണത്തിൽ ഇന്ത്യയെ മറികടന്ന് ചൈന ഒന്നാമതെത്തി.

യു.എസ്. സർവകലാശാലകളിലെ സാധാരണയായി പ്രവേശന നടപടികൾ ആരംഭിക്കുന്നത് ഓഗസ്റ്റിലാണ്. എന്നാൽ ഈ വർഷം ആകെ 3,13,138 വിദ്യാർത്ഥി വിസകൾ മാത്രമാണ് യു.എസ്. അനുവദിച്ചത്.  ചൈനയിലെ പ്രധാന നഗരങ്ങളിൽ നിന്നുള്ള വിദ്യാർത്ഥികൾക്ക് അമേരിക്ക 86,647 വിസകളാണ് അനുവദിച്ചത്. ഇത് ഇന്ത്യക്കാർക്ക് അനുവദിച്ചതിൻ്റെ ഇരട്ടിയിലധികം വരുമെന്നാണ് കണക്കുകൾ സൂചിപ്പിക്കുന്നത്. കൂടാതെ മുസ്ലീം ഭൂരിപക്ഷമുള്ള രാജ്യങ്ങളിൽ നിന്നുമുള്ള വിദ്യാർത്ഥി വിസകളിലും കുത്തനെ ഇടിവുണ്ടായതാണ് റിപ്പോർട്ട്. ഇറാനിൽ നിന്നുള്ള പ്രവേശനം 86 ശതമാനം കുറഞ്ഞതായും കണക്കുകൾ സൂചിപ്പിക്കുന്നു.

2024 ഓഗസ്റ്റിലെ കണക്കുകളുമായി താരതമ്യം ചെയ്യുമ്പോൾ, വിസകളുടെ എണ്ണത്തിൽ 19.1% കുറവുണ്ടായതായി ഇൻ്റർനാഷണൽ ട്രേഡ് കമ്മീഷൻ റിപ്പോർട്ട് ചെയ്തു. അതേസമയം കഴിഞ്ഞ വര്‍ഷം യുഎസിലേക്ക് ഏറ്റവും കൂടുതല്‍ വിദേശ വിദ്യാര്‍ത്ഥികള്‍ എത്തിയത് ഇന്ത്യയില്‍ നിന്നാണ്. മുന്‍ വര്‍ഷവുമായി താരതമ്യം ചെയ്യുമ്പോൾ 44.5 ശതമാനം ഇടിവാണ് യുഎസിലേക്കുള്ള ഇന്ത്യന്‍ വിദ്യാര്‍ത്ഥി വിസകളില്‍ ഈ വര്‍ഷം ഉണ്ടായത്. ചൈനീസ് വിദ്യാര്‍ത്ഥികള്‍ക്കുള്ള വിസ വിതരണത്തിലും കുറവുണ്ടായിട്ടുണ്ടെങ്കിലും ഇതേ നിരക്കിലല്ല. കുടിയേറ്റം തടയുന്നതിനും ഇടതുപക്ഷത്തിൻ്റെ ശക്തികേന്ദ്രമായി ട്രംപ് ഭരണകൂടം കരുതുന്ന സർവകലാശാലകളെ ദുർബലപ്പെടുത്തുന്നതിനും വേണ്ടിയാണ് ട്രംപ് വീണ്ടും അധികാരത്തിലെത്തിയ ശേഷം മുൻതൂക്കം നൽകിയത്.