ഇസ്ലാമാബാദ്: അറബിക്കടലിൽ ഒരു പുതിയ തുറമുഖം നിർമ്മിക്കുന്നതിനായി പാകിസ്താൻ അമേരിക്കയെ ക്ഷണിച്ചതായി റിപ്പോർട്ട്. പാക് സൈനിക മേധാവി ഫീൽഡ് മാർഷൽ അസിം മുനീറിന്റെ ഉപദേഷ്ടാക്കൾ യുഎസ് ഉദ്യോഗസ്ഥരെ സമീപിച്ചതായാണ് വിവരം. ഈ പദ്ധതി പ്രകാരം, പാകിസ്താനിലെ സുപ്രധാന ധാതുക്കളുള്ള പസ്‌നി ടൗണിലേക്ക് അമേരിക്കൻ നിക്ഷേപകർക്ക് കൂടി പ്രവേശനം സാധ്യമാക്കും. ബലൂചിസ്ഥാനിലെ ഗവാധാർ ജില്ലയിലെ തുറമുഖ പട്ടണമാണ് പസ്‌നി.
അഫ്ഗാനിസ്ഥാൻ, ഇറാൻ എന്നീ രാജ്യങ്ങൾ അതിർത്തിയായി വരുന്ന തന്ത്രപ്രധാനമായ പ്രദേശമാണിത്. ഫിനാൻഷ്യൽ ടൈംസാണ് ഇത് സംബന്ധിച്ച റിപ്പോർട്ട് പുറത്തുവിട്ടത്.സെപ്തംബറിൽ പാക് പ്രധാനമന്ത്രി ഷെഹബാസ് ഷെരീഫും സൈനിക മേധാവി അസിം മുനീറും യുഎസ് പ്രസിഡന്റ് ഡോണൾഡ് ട്രംപുമായി നടത്തിയ കൂടിക്കാഴ്ചയ്ക്ക് പിന്നാലെയാണ് തുറമുഖം സംബന്ധിച്ച സുപ്രധാന നീക്കം.കൂടിക്കാഴ്ചയിൽ, പാകിസ്താനിലെ കാർഷികം, സാങ്കേതികം, ഖനനം, ഊർജ മേഖലകളിൽ യുഎസ് കമ്പനികളുടെ നിക്ഷേപം പാക് പ്രധാനമന്ത്രി ആവശ്യപ്പെട്ടിരുന്നു.
ഈ കൂടിക്കാഴ്ചയ്ക്കിടെയാണ് സൈനിക മേധാവി അസിം മുനീർ യുഎസ് ഉദ്യോഗസ്ഥരെ മുഖേന തുറമുഖ നിർമ്മാണം സംബന്ധിച്ച കാര്യങ്ങൾ അറിയിച്ചതെന്നാണ് റിപ്പോർട്ടുകൾ. തുറമുഖ നിർമ്മാണത്തിന്റെയും നടത്തിപ്പിന്റെയും ചുമതല യുഎസിന് നൽകാനാണ് സാധ്യത.
തുറമുഖം നിർമ്മിച്ചാലും യുഎസ് സൈനിക താവളങ്ങൾക്കായി അത് ഉപയോഗിക്കില്ല. എങ്കിലും, ധാതു സമ്പന്നമായ പ്രദേശങ്ങളെ ബന്ധിപ്പിച്ച് ട്രെയിൻ സംവിധാനം നടപ്പാക്കാനാണ് പാകിസ്താൻ പ്രധാനമായും ഈ പദ്ധതിയിലൂടെ ലക്ഷ്യമിടുന്നത്.