തിരുവനന്തപുരം: ശബരിമലയിലെ സ്വർണ്ണവാതിൽ വിവാദവുമായി ബന്ധപ്പെട്ട് ഉയരുന്ന ആരോപണങ്ങളിൽ പ്രതികരിച്ച് നടൻ ജയറാം. ശബരിമലയിലേക്ക് നിർമ്മിച്ചു നൽകിയ സ്വർണ്ണ വാതിൽ ചെന്നൈയിൽ തന്റെ വസതിയിൽ വച്ചല്ല പൂജിച്ചതെന്ന് അദ്ദേഹം വ്യക്തമാക്കി. സ്വർണം പൂശിയ കമ്പനിയിലെ അമ്പത്തൂരിലെ ഓഫീസ് റൂമിൽ വച്ചായിരുന്നു എന്നും അദ്ദേഹം വ്യക്തമാക്കി. വിഷയത്തിൽ ആരോപണ വിധേയനായ ഉണ്ണികൃഷ്ണൻ പോറ്റിയാണ് തന്നെ പൂജയ്ക്ക് ക്ഷണിച്ചതെന്ന് ജയറാം പറഞ്ഞു. ഈ സംഭവം ഇത്തരത്തിൽ ഒരു വിവാദമായി മാറുമെന്ന് താൻ ഒരിക്കലും പ്രതീക്ഷിച്ചില്ലെന്നും അദ്ദേഹം പ്രതികരിച്ചു.
ഉണ്ണികൃഷ്ണൻ പോറ്റിയുമായി തനിക്ക് ശബരിമലയിൽ വെച്ചുള്ള പരിചയമാണുള്ളത്. താൻ എല്ലാ വർഷവും മകരവിളക്ക് കാണാൻ പോകാറുണ്ട്. പോറ്റിയുടെ സമൂഹവിവാഹം, സൈക്കിൾ വിതരണം തുടങ്ങിയ മറ്റ് ജീവകാരുണ്യ പ്രവർത്തനങ്ങളെക്കുറിച്ചും അദ്ദേഹം തന്നെ വിളിച്ച് അറിയിക്കാറുണ്ടെന്ന് മനോരമ ന്യൂസിനോട് ജയറാം പറഞ്ഞു. ബംഗളൂരുവിൽ നിന്നാണ് ഉണ്ണികൃഷ്ണൻ പോറ്റി തന്നെ പൂജയിലേക്ക് ക്ഷണിച്ചതെന്ന് ജയറാം അറിയിച്ചു. ശബരിമലയിലേക്ക് പോകുന്നതിന് മുൻപ് അവിടെ വെച്ച് പൂജയുണ്ടെന്ന് അറിയിച്ചപ്പോൾ, ഒരു അയ്യപ്പഭക്തൻ എന്ന നിലയിൽ അതിനെ താൻ മഹാഭാഗ്യമായി കരുതി.
വീരമണി സ്വാമിയെ പൂജയിലേക്ക് ക്ഷണിച്ചതും താനാണെന്നും ജയറാം വെളിപ്പെടുത്തി. വീരമണി സ്വാമി പാട്ട് പാടുകയും താൻ പൂജയിൽ പങ്കെടുക്കുകയും മാത്രമാണ് ചെയ്തത്. പൂജ ചെയ്യണമെന്ന് മാത്രമാണ് ആവശ്യപ്പെട്ടത്, ദക്ഷിണയൊന്നും നൽകിയില്ല.താൻ പങ്കെടുത്ത പൂജയിലൂടെ അയ്യപ്പനെ കൊണ്ടുപോകാൻ കഴിഞ്ഞത് വലിയൊരു ഭാഗ്യമായി കരുതുന്നു. എന്നാൽ, ഈ സംഭവം ഇത്തരത്തിൽ ഒരു വിവാദമായി മാറുമെന്ന് താൻ ഒരിക്കലും അറിഞ്ഞിരുന്നില്ലെന്നും അദ്ദേഹം കൂട്ടിച്ചേർത്തു.