വാഷിങ്ടൻ: തനിക്ക് നോഹൽ സമ്മാനം നൽകണമെന്ന് വീണ്ടും ആവശ്യം ഉന്നയിച്ച് യുഎസ് പ്രസി‍‍ഡന്റ് ഡൊണാൾഡ് ട്രംപ്. ഏഴ് അന്താരാഷ്ട്ര സംഘർഷങ്ങളെങ്കിലും അവസാനിപ്പിച്ച തനിക്ക് നോബൽ സമ്മാനം ലഭിക്കാതിരിരുന്നാൽ അത് തന്റെ രാജ്യത്തിനു തന്നെ അപമാനമാകുമെന്ന് ഡോണാൾഡ് ട്രംപ് പ്രസ്താവിച്ചു. ഗാസ സമാധാന പദ്ധതി പ്രഖ്യാപിച്ചതിന് തൊട്ടുപിന്നാലെയാണ് സമാധാനത്തിനുള്ള നോബൽ സമ്മാനത്തിന് വേണ്ടിയുള്ള ട്രംപിന്റെ ഈ പുതിയ അവകാശവാദം. യുഎസിലെ സൈനിക ഉദ്യോഗസ്ഥരെ അഭിസംബോധന ചെയ്ത് സംസാരിക്കവെയാണ് ട്രംപ് തന്റെ ആഗ്രഹം വ്യക്തമാക്കിയത്.
ട്രംപിൻ്റെ വാക്കുകൾ…
"നിങ്ങൾക്ക് നോബൽ സമ്മാനം ലഭിക്കുമോ? തീർച്ചയായും ലഭിക്കില്ല. ഒരു കാര്യവും ചെയ്യാത്ത ഒരാൾക്ക് അവർ അത് നൽകും. നമുക്ക് അത് ലഭിച്ചില്ലെങ്കിൽ രാജ്യത്തിന് വലിയ അപമാനമായിരിക്കും. എനിക്ക് അത് വേണ്ട. എന്നാൽ രാജ്യത്തിന് അത് ലഭിക്കണം. രാജ്യത്തിന് തീർച്ചയായും അത് ലഭിക്കണം, കാരണം ഇങ്ങനെയൊന്ന് ഒരിക്കലും ഉണ്ടായിട്ടില്ല," ട്രംപ് പറഞ്ഞു.
ഗാസ സമാധാന കരാറിനെ പരാമർശിച്ചുകൊണ്ട് അദ്ദേഹം കൂട്ടിച്ചേർത്തു: "ഇതുകൂടി വിജയിച്ചാൽ, എട്ട് മാസത്തിനുള്ളിൽ നമ്മൾ എട്ട് യുദ്ധങ്ങൾക്ക് പരിഹാരം കണ്ടു. അത് വളരെ മികച്ചതാണ്. ആരും ഇന്നുവരെ ഇത് ചെയ്തിട്ടില്ല."
ഇന്ത്യയും പാക്കിസ്ഥാനും തമ്മിലുള്ള സംഘർഷം അവസാനിപ്പിച്ചത് താനാണെന്ന അവകാശവാദവും ട്രംപ് ഉന്നയിച്ചിരുന്നു. എന്നാൽ ഇരു രാജ്യവും അത് നിഷേദിച്ചു. ഓപ്പറേഷൻ സിന്ദൂർ അവസാനിപ്പിച്ചതിൽ മൂന്നാംകക്ഷിയുടെ ഇടപെടൽ ഉണ്ടായിട്ടില്ലെന്ന് വിദേശകാര്യമന്ത്രാലയം വ്യക്തമാക്കി.