യുഎസ് പ്രസിഡന്റ് ഡോണൾഡ് ട്രംപിന്റെ ഗാസ സമാധാന പദ്ധതിയെ പ്രധാനമന്ത്രി നരേന്ദ്ര മോദി സ്വാഗതം ചെയ്തു. ഈ പദ്ധതി പാലസ്തീൻ, ഇസ്രായേൽ ജനതയ്ക്കും പശ്ചിമേഷ്യൻ മേഖലയ്ക്ക് മൊത്തത്തിലും ദീർഘകാലവും സുസ്ഥിരവുമായ സമാധാനത്തിനും സുരക്ഷയ്ക്കും വികസനത്തിനും ഉള്ള പ്രായോഗികമായ ഒരു വഴിയാണെന്ന് മോദി വിശേഷിപ്പിച്ചു. സംഘർഷം അവസാനിപ്പിച്ച് സമാധാനം ഉറപ്പാക്കാനുള്ള ട്രംപിന്റെ ശ്രമങ്ങൾക്ക് പ്രധാനമന്ത്രി മോദി തന്റെ പിന്തുണ അറിയിക്കുകയും ചെയ്തു.

"ഗാസ സംഘർഷം അവസാനിപ്പിക്കാനുള്ള സമഗ്രമായ പദ്ധതിയെക്കുറിച്ചുള്ള പ്രസിഡന്റ് ഡോണാൾഡ് ജെ ട്രംപിന്റെ പ്രഖ്യാപനത്തെ ഞങ്ങൾ സ്വാഗതം ചെയ്യുന്നു. ഇത് പലസ്തീൻ, ഇസ്രായേൽ ജനതയ്ക്ക്, അതുപോലെ വിശാലമായ പശ്ചിമേഷ്യൻ മേഖലയ്ക്ക് ദീർഘകാലവും സുസ്ഥിരവുമായ സമാധാനം, സുരക്ഷ, വികസനം എന്നിവയിലേക്കുള്ള പ്രായോഗികമായ ഒരു വഴി നൽകുന്നു," മോദി ഫേസ്ബുക്കിലും എക്സിലുമായി കുറിച്ചു. ബന്ധപ്പെട്ട എല്ലാവരും പ്രസിഡന്റ് ട്രംപിന്റെ ഈ സംരംഭത്തിന് പിന്നിൽ അണിനിരക്കുകയും സംഘർഷം അവസാനിപ്പിച്ച് സമാധാനം ഉറപ്പാക്കാനുള്ള ഈ ശ്രമത്തെ പിന്തുണയ്ക്കുകയും ചെയ്യുമെന്നും അദ്ദേഹം പ്രത്യാശ പ്രകടിപ്പിച്ചു.

ഈ പ്രഖ്യാപനം വന്നത് ഇസ്രായേലും ഹമാസും അംഗീകരിക്കുകയാണെങ്കിൽ ഗാസ യുദ്ധം ഉടൻ അവസാനിപ്പിക്കാൻ സാധിക്കുമെന്ന് ട്രംപ് പറഞ്ഞ 20 ഇന റോഡ്മാപ്പ് പുറത്തിറക്കിയതിന് തൊട്ടുപിന്നാലെയാണ്. ഈ പദ്ധതി ട്രംപ് പ്രഖ്യാപിച്ചത് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവുമായി വാഷിംഗ്ടണിൽ നടത്തിയ കൂടിക്കാഴ്ചയ്ക്ക് ശേഷമാണ്.