വാഷിങ്ടൻ: കോവിഡ് എന്ന മഹാമാരി തീർത്ത ദുരിതങ്ങളിൽ നിന്നും ഇപ്പോഴും പല രാജ്യങ്ങളും കരകയറിയിട്ടില്ല. ഇതിനിടെ അമേരിക്കയിലെ ചില പ്രദേശങ്ങളിൽ കോവിഡ്-19 ന്റെ പുതിയ വകഭേദം വീണ്ടും പടർന്നുപിടിക്കുക്കുന്നതായി റിപ്പോർട്ട്. 'സ്ട്രേറ്റസ്' എന്നും അറിയപ്പെടുന്ന XFG വകഭേദം തെക്കുകിഴക്കൻ ഏഷ്യയിലാണ് ആദ്യമായി കണ്ടെത്തിയത്.

ന്യൂയോർക്ക്, ന്യൂജേഴ്സി, ഡെലവെയർ, വെർമോണ്ട്, മിഷിഗൺ, വിസ്കോൺസിൻ, മിനസോട്ട, നോർത്ത് ഡക്കോട്ട, സൗത്ത് ഡക്കോട്ട തുടങ്ങി യുഎസിലെ ഒൻപത് സംസ്ഥാനങ്ങളിൽ കോവിഡ് കേസുകൾ വർധിക്കുന്നതായി സെന്റേഴ്സ് ഫോർ ഡിസീസ് കൺട്രോൾ ആൻഡ് പ്രിവൻഷൻ അറിയിച്ചു. ഈ വർഷം ആദ്യം തെക്കുകിഴക്കൻ ഏഷ്യയിലാണ് സ്ട്രേറ്റസ് വകഭേദം ആദ്യമായി കണ്ടെത്തിയത്. ജൂണായപ്പോഴേക്കും ഇത് 38 രാജ്യങ്ങളിലേക്ക് വ്യാപിച്ചതായി ലോകാരോഗ്യ സംഘടന റിപ്പോർട്ട് ചെയ്യുന്നു.

പ്രധാന ലക്ഷണങ്ങൾ

സ്ട്രേറ്റസ് വകഭേദത്തിലും കോവിഡിൻ്റെ സാധാരണ ലക്ഷണങ്ങളെല്ലാം കാണപ്പെടുന്നുണ്ട്. അതേസമയം, വാക്സിനെടുത്തവരിൽ രോഗത്തിൻ്റെ കാഠിന്യം കുറവായിരിക്കുമെന്നും റിപ്പോർട്ട്. സാധാരണയായി ക്ഷീണം, പനി, തുടർച്ചയായ വരണ്ട ചുമ എന്നിവയാണ് ലക്ഷണങ്ങൾ. ഇവ കൂടാതെ, ശ്വാസതടസ്സം, നെഞ്ചുവേദന, തൊണ്ടവേദന, തലവേദന, ശരീരവേദന, വയറുവേദന, ഓക്കാനം, ബ്രയിൻഫോഗ്, രുചിയോ മണമോ നഷ്ടപ്പെടൽ എന്നിവയും സ്ട്രാറ്റസ് വകഭേദത്തിൻ്റെ മറ്റ് ലക്ഷണങ്ങളാണ്. ഈ ലക്ഷണങ്ങൾ കണ്ടാൽ ഉടൻ തന്നെ വിദഗ്ധ ചികിത്സ തേടാൻ ആരോഗ്യ പ്രവർത്തകർ നിർദ്ദേശിക്കുന്നു.

കൂടാതെ 103 ഡിഗ്രിയിൽ കൂടുതലുള്ള പനി മൂന്ന് ദിവസത്തിലധികം നീണ്ടുനിൽക്കുകയാണെങ്കിൽ ശ്രദ്ധിക്കണം. അല്ലെങ്കിൽ പനി മെച്ചപ്പെട്ടതിനുശേഷം വീണ്ടും ലക്ഷണങ്ങൾ വഷളാവുക എന്നിവ സംഭവിച്ചാൽ ഡോക്ടറെ എത്രയും പെട്ടെന്ന് സന്ദർശിക്കുക. കൂടാതെ, തിരക്കുള്ള സ്ഥലങ്ങളിൽ മാസ്ക് ഉപയോഗിക്കുന്നത് നിർബന്ധമാക്കുക, ഇടയ്ക്കിടെ കൈ കഴുകുക, മറ്റുള്ളവരുമായി അടുത്ത സമ്പർക്കം ഒഴിവാക്കുക തുടങ്ങിയ അടിസ്ഥാന പ്രതിരോധ മാർഗ്ഗങ്ങൾ എപ്പോഴും പാലിക്കണം.