എച്ച്-1ബി വിസ ഫീസ് ഒരു ലക്ഷം ഡോളറായി വർധിപ്പിച്ച അമേരിക്കൻ പ്രസിഡന്റ് ഡൊണാൾഡ് ട്രംപിന്റെ നടപടിക്കെതിരെ രൂക്ഷവിമർശനവുമായി കോടീശ്വരനായ സിലിക്കൺ വാലി നിക്ഷേപകൻ മൈക്കിൾ മോറിറ്റ്‌സ്. ഗൂഗിൾ, പേപാൽ തുടങ്ങിയ പ്രമുഖ ടെക് കമ്പനികളിലെ നിക്ഷേപങ്ങളിലൂടെ ആധുനിക ടെക് വ്യവസായത്തെ രൂപപ്പെടുത്താൻ സഹായിച്ച വ്യക്തിയാണ് മോറിറ്റ്‌സ്. ട്രംപിന്റെ പുതിയ നയം തിരിച്ചടിയാകുമെന്നും, അമേരിക്കൻ ടെക് മുന്നേറ്റത്തിന് പിന്നിലുള്ള ഘടകങ്ങൾ എന്താണെന്ന് ഭരണകൂടത്തിന് അറിയില്ലെന്നാണ് ഈ നടപടിയിലൂടെ വ്യക്തമാക്കുന്നതെന്നും അദ്ദേഹം പറഞ്ഞു.
'ഫിനാൻഷ്യൽ ടൈംസിൽ' എഴുതിയ ലേഖനത്തിലൂടെയാണ് ട്രംപിന്റെ എച്ച്-1ബി വിസാ നയം തിരിച്ചടിക്കുമെന്ന് മോറിറ്റ്‌സ് മുന്നറിയിപ്പ് നൽകിയത്. സാങ്കേതികവിദ്യയിലെ പുരോഗതി കാരണം, കമ്പനികൾക്ക് വിദേശ തൊഴിലാളികളെ അമേരിക്കയിലേക്ക് കൊണ്ടുവരുന്നതിനേക്കാൾ എളുപ്പം ജോലികൾ വിദേശത്തേക്ക് മാറ്റുക എന്നതാണ്. ഈ നയം, അമേരിക്കയുടെ സാങ്കേതികവിദ്യാ മേഖല ഇത്രയധികം വിജയിച്ചത് എന്തുകൊണ്ടാണെന്നതിനെക്കുറിച്ച് പ്രസിഡന്റിനും അദ്ദേഹത്തിന്റെ അനുയായികൾക്കും വലിയ ധാരണ ഇല്ലാത്തതുകൊണ്ടാണെന്നും അദ്ദേഹം ചൂണ്ടിക്കാട്ടി.
കിഴക്കൻ യൂറോപ്പ്, തുർക്കി, ഇന്ത്യ എന്നിവിടങ്ങളിലെ മികച്ച സർവകലാശാലകളിൽ നിന്നുള്ള എഞ്ചിനീയർമാർ അമേരിക്കൻ സഹപ്രവർത്തകരെപ്പോലെ തന്നെ യോഗ്യരാണ്. ഇവർ ചെയ്യുന്ന ജോലികൾ സാൻ ഫ്രാൻസിസ്കോയിൽ എന്നതുപോലെ എളുപ്പത്തിൽ ഇസ്താംബുൾ, ടാലിൻ, വാർസോ, പ്രാഗ്, അല്ലെങ്കിൽ ബെംഗളൂരു എന്നിവിടങ്ങളിലും ചെയ്യാൻ കഴിയും.
വലിയ ടെക് കമ്പനികൾ വിദേശ പൗരന്മാരെ നിയമിക്കുന്നത് പ്രത്യേക കഴിവുകൾ ഉള്ളതുകൊണ്ടാണ്. യു.എസിൽ ജീവനക്കാരുടെ ക്ഷാമം നേരിടുന്ന മേഖലകളിലെ ജോലികൾക്കായി അവരെ നിലനിർത്തേണ്ടതുണ്ട്. കമ്പനികൾ എച്ച്-1ബി ജീവനക്കാരെ നിയമിക്കുന്നത് അമേരിക്കക്കാർക്ക് ജോലി നിഷേധിക്കാനോ ചെലവ് ചുരുക്കാനോ അല്ലെന്നും അദ്ദേഹം പറഞ്ഞു.
ഈ നയം നൂതനാശയങ്ങളെ വിദേശത്തേക്ക് തള്ളിവിടുമെന്നും യു.എസിൽ നിന്ന് പുതിയ തലമുറ സംരംഭകരെ ഇല്ലാതാക്കുമെന്നും മോറിറ്റ്‌സ് മുന്നറിയിപ്പ് നൽകി. "ട്രംപിന്റെ അടുത്ത നീക്കത്തെ ഭയന്ന് കമ്പനികൾ അവരുടെ നയങ്ങളിൽ മാറ്റം വരുത്തിയാൽ, വിദേശ സമ്പദ്‌വ്യവസ്ഥകൾക്ക് ഉത്തേജനം ലഭിക്കും," അദ്ദേഹം ലേഖനത്തിൽ വ്യക്തമാക്കി.