2025 ഒക്ടോബർ 1 മുതൽ, അമേരിക്കയിലേക്ക് ഇറക്കുമതി ചെയ്യുന്ന എല്ലാ ബ്രാൻഡഡ് അല്ലെങ്കിൽ പേറ്റന്റ് ഉള്ള മരുന്നുകൾക്കും 100 ശതമാനം തീരുവ ചുമത്തുമെന്ന് പ്രസി‍ന്റ് ഡൊണാൾഡ് ട്രംപ്. ഈ തീരുവ, മരുന്ന് നിർമ്മാണ കമ്പനികൾ അമേരിക്കയിൽ ഉൽപ്പാദന പ്ലാന്റുകൾ സ്ഥാപിക്കുകയോ അല്ലെങ്കിൽ പ്ലാന്റ് നിർമ്മാണം ആരംഭിക്കുകയോ ചെയ്തിട്ടില്ലെങ്കിൽ മാത്രമാണ് ബാധകമാവുക. ഈ പുതിയ നയം ട്രംപ് തന്റെ സോഷ്യൽ മീഡിയ പ്ലാറ്റ്‌ഫോമായ ട്രൂത്ത് സോഷ്യലിലാണ് കുറിച്ചത്.
അതേസമയം പ്ലാന്റിന്റെ നിർമ്മാണം ആരംഭിച്ച കമ്പനികൾക്ക് അവരുടെ ഫാർമസ്യൂട്ടിക്കൽ ഉൽപ്പന്നങ്ങൾക്ക് തീരുവ ഉണ്ടാകില്ലെന്നും അദ്ദേഹം വ്യക്തമാക്കി. ഈ നീക്കം അമേരിക്കയിലേക്ക് കൂടുതൽ മരുന്ന് നിർമ്മാതാക്കളെ ആകർഷിക്കാനും രാജ്യത്തെ ഉത്പാദനം വർദ്ധിപ്പിക്കാനുമാണ് ലക്ഷ്യമിടുന്നത്. കമ്പനികളെ കൂടുതൽ ആഭ്യന്തര ഫാക്ടറികളിൽ നിക്ഷേപം നടത്താൻ നിർബന്ധിതരാക്കുന്നതിനുള്ള പ്രധാന മാർഗ്ഗം തീരുവകൾ (Tariffs) ഏർപ്പെടുത്തുക എന്നതാണെന്ന് ട്രംപിന്റെ വാദം.
ഇന്ത്യയെ ബാധിക്കുമോ?
ഈ വർഷം ഓഗസ്റ്റിൽ പുറത്തുവന്ന എസ്ബിഐ റിസർച്ച് റിപ്പോർട്ട് അനുസരിച്ച്, ഫാർമസ്യൂട്ടിക്കൽ വ്യവസായത്തിൽ തീരുവകൾ ഏർപ്പെടുത്തുന്നത് ഇന്ത്യൻ ഫാർമ കമ്പനികളുടെ വരുമാനത്തെ കാര്യമായി ബാധിക്കും. കാരണം, ഇന്ത്യയുടെ മൊത്തം ഫാർമസ്യൂട്ടിക്കൽ കയറ്റുമതിയുടെ ഏകദേശം 40 ശതമാനവും യുഎസ് വിപണിയിലേക്കാണ്.
ട്രംപ് ഇന്ത്യൻ ഫാർമ കയറ്റുമതിക്ക് 50 ശതമാനം തീരുവ ചുമത്തുകയാണെങ്കിൽ, 2026 സാമ്പത്തിക വർഷത്തിൽ ഫാർമസ്യൂട്ടിക്കൽ കമ്പനികളുടെ വരുമാനം 5 മുതൽ 10 ശതമാനം വരെ കുറഞ്ഞേക്കാം എന്നും റിപ്പോർട്ട് ചൂണ്ടിക്കാട്ടുന്നു. ഇതിന് കാരണം, നിരവധി പ്രമുഖ ഇന്ത്യൻ ഫാർമ കമ്പനികളുടെ മൊത്തം വരുമാനത്തിന്റെ 40 മുതൽ 50 ശതമാനം വരെ യുഎസ് വിപണിയിൽ നിന്നാണ് ലഭിക്കുന്നത് എന്നതാണ്.
2025 സാമ്പത്തിക വർഷത്തിൽ, ഇന്ത്യയുടെ മൊത്തം ഫാർമസ്യൂട്ടിക്കൽ കയറ്റുമതിയുടെ ഏകദേശം 40 ശതമാനവും യുണൈറ്റഡ് സ്റ്റേറ്റ്സിലേക്കായിരുന്നു. അതേസമയം, 2024-ൽ യുഎസിന്റെ മൊത്തം ഫാർമ ഇറക്കുമതിയിൽ ഇന്ത്യയുടെ പങ്ക് 6 ശതമാനമായിരുന്നു.