പത്തനംതിട്ട: എൻഎസ്എസ് (നായർ സർവീസ് സൊസൈറ്റി) ജനറൽ സെക്രട്ടറി ജി. സുകുമാരൻ നായർക്കെതിരെ പത്തനംതിട്ട വെട്ടിപ്രം കരയോഗം കെട്ടിടത്തിന് മുന്നിൽ പ്രതിഷേധ ബാനർ. 'സുകുമാരൻ നായർ കട്ടപ്പ' എന്ന് പരിഹസിക്കുന്നതാണ് പ്രധാന ബാനർ.
കുടുംബപരമായ കാര്യങ്ങൾക്കായി സുകുമാരൻ നായർ അയ്യപ്പഭക്തരെ പിന്നിൽ നിന്ന് കുത്തിയെന്നും, അദ്ദേഹം സമുദായത്തിന് നാണക്കേടാണ് എന്നും ബാനറിൽ ആരോപിക്കുന്നു.
മുഖ്യമന്ത്രി പിണറായി വിജയനെയും സംസ്ഥാന സർക്കാരിനെയും അനുകൂലിച്ച് സുകുമാരൻ നായർ നടത്തിയ പ്രസ്താവനകൾക്ക് പിന്നാലെയാണ് സമുദായത്തിൽ നിന്ന് തന്നെ ഈ ശക്തമായ പ്രതിഷേധം ഉയർന്നിരിക്കുന്നത്. എൻഎസ്എസ് നേതൃത്വത്തിനെതിരെ സമുദായ അംഗങ്ങൾക്കിടയിൽ നിലനിൽക്കുന്ന അതൃപ്തിയാണ് ഈ ബാനറുകളിലൂടെ പുറത്തുവന്നിരിക്കുന്നത്.
സർക്കാരിനെ എൻഎസ്എസിന് വിശ്വാസമുണ്ട്. വിശ്വാസ പ്രശ്നത്തിലെ നിലപാട് മാറ്റം സ്വാഗതാർഹഹമെന്ന് ജി സുകുമാരൻ നായർ പറഞ്ഞിരുന്നു. അതേസമയം, ശബരിമല വിഷയത്തിൽ കോൺഗ്രസിന്റേത് കള്ളക്കളിയാണ് എന്നും അവർക്ക് ഉറച്ച നിലപാടില്ല എന്നും സുകുമാരൻ നായർ ആരോപിച്ചു.
കോൺഗ്രസ് ഭൂരിപക്ഷ സമുദായത്തെ പരിഗണിക്കുന്നില്ല എന്നും അദ്ദേഹം വിമർശിച്ചു. ബി.ജെ.പി ഒന്നും ചെയ്യുന്നില്ലെന്നും, കേന്ദ്ര സർക്കാർ വിശ്വാസികൾക്കായി ഒന്നും ചെയ്തില്ലെന്നും നിയമം കൊണ്ടുവരുമെന്ന ഉറപ്പ് പാലിച്ചില്ലെന്നും സുകുമാരൻ നായർ കൂട്ടിച്ചേർത്തു.