യുഎസ് പ്രസിഡന്റ് ഡൊണാൾഡ് ട്രംപിന്റെ റഷ്യയ്ക്കെതിരായ "കടലാസ് കടുവ" (paper tiger) എന്ന പരാമർശത്തോട് ശക്തമായി പ്രതികരിച്ച് ക്രെംലിൻ. റഷ്യ ഒരു കരടിയാണെന്നും "കടലാസ് കരടികൾ" ഇല്ലെന്നും ക്രെംലിൻ വ്യക്തമാക്കി. റഷ്യ മൂന്നര വർഷമായി യുക്രെയ്നുമായി ലക്ഷ്യമില്ലാതെ പോരാടുകയാണെന്നും അത് അവരെ "ഒരു കടലാസ് കടുവ" പോലെയാക്കിയെന്നുമായിരുന്നു ട്രംപിന്റെ പരാമർശം. സോഷ്യൽമീഡിയ പ്ലാറ്റ്ഫോമായ ട്രൂത്തിലൂടെയാണ് ട്രംപിന്റെ പ്രതികരണം.
മുൻ നിലപാടുകളിൽ നിന്ന് വ്യത്യസ്തമായി, യൂറോപ്യൻ യൂണിയന്റെ പിന്തുണയോടെ, 2022 മുതൽ റഷ്യ കൈവശപ്പെടുത്തിയ എല്ലാ പ്രദേശങ്ങളും തിരിച്ചുപിടിക്കാൻ യുക്രെയ്‌ന് അവസരമുണ്ടെന്ന് ട്രംപ് പറഞ്ഞു. റഷ്യയുടെ സമ്പദ്‌വ്യവസ്ഥ വലിയ പ്രതിസന്ധിയിലാണെന്നും, യുക്രെയ്‌ൻ ഇപ്പോൾത്തന്നെ നടപടിയെടുക്കണമെന്നും അദ്ദേഹം ആവശ്യപ്പെട്ടു.
ചൊവ്വാഴ്ച ഐക്യരാഷ്ട്രസഭയുടെ പൊതുസഭയ്ക്കിടെ യുക്രേനിയൻ പ്രസിഡന്റ് വോളോഡിമർ സെലെൻസ്‌കിയെ സന്ദർശിച്ചതിന് ശേഷമാണ് ട്രംപിന്റെ ഈ പരാമർശം.