ശബരിമല സംരക്ഷണ സംഗമ വേദിയിൽ മുഖ്യമന്ത്രി പിണറായി വിജയനെ രൂക്ഷമായി വിമർശിച്ച് തമിഴ്നാട് ബി.ജെ.പി. മുൻ അധ്യക്ഷൻ കെ. അണ്ണാമലൈ. ഭക്തരെങ്ങനെയായിരിക്കണം എന്നതിനെക്കുറിച്ച് ഭഗവദ്ഗീതയിലെ വചനങ്ങൾ പിണറായി വിജയൻ തങ്ങളെ പഠിപ്പിക്കേണ്ടെന്നും, കണ്ണാടിയിൽ നോക്കി സ്വയം പഠിച്ചാൽ മതിയെന്നും അദ്ദേഹം പറഞ്ഞു.

അയ്യപ്പനോട് ആത്മാർത്ഥതയുണ്ടെങ്കിൽ, സുപ്രീം കോടതിയിൽ സർക്കാർ നൽകിയ സത്യവാങ്മൂലം തിരുത്തുകയാണ് വേണ്ടതെന്നും അണ്ണാമലൈ ആവശ്യപ്പെട്ടു. 2018-ൽ അയ്യപ്പഭക്തരെ അടിച്ചമർത്തിയവർക്ക് എങ്ങനെയാണ് അയ്യപ്പസംഗമം നടത്താൻ സാധിക്കുകയെന്നും അദ്ദേഹം ചോദിച്ചു. ആഗോള അയ്യപ്പ സംഗമത്തിന് ബദലായിട്ടാണ് പന്തളത്ത് സംഘപരിവാർ ശബരിമല സംരക്ഷണ സംഗമം സംഘടിപ്പിച്ചത്.

കേരള മുഖ്യമന്ത്രിക്ക് പുറമെ തമിഴ്നാട് മുഖ്യമന്ത്രി എം.കെ. സ്റ്റാലിനെയും കെ. അണ്ണാമലൈ രൂക്ഷമായി വിമർശിച്ചു. 'സനാതന ധർമം വേരോടെ പിഴുതെറിയണം' എന്ന് പറഞ്ഞ സ്റ്റാലിനെയാണ് അയ്യപ്പസംഗമത്തിന് ക്ഷണിച്ചതെന്ന് അദ്ദേഹം ചൂണ്ടിക്കാട്ടി. സ്റ്റാലിനും പിണറായിയും വോട്ടിനുവേണ്ടി നാസ്തിക നാടകം കളിക്കുകയാണെന്നും, രാഷ്ട്രീയ ലക്ഷ്യങ്ങളോടെയാണ് സർക്കാർ അയ്യപ്പസംഗമം നടത്തിയതെന്നും അണ്ണാമലൈ ആരോപിച്ചു. കൂടാതെ, നിയമസഭാ സ്പീക്കർ എ.എൻ. ഷംസീറിന് ഗണപതി വെറുമൊരു മിത്ത് മാത്രമാണെന്നും ഉദ്ഘാടന പ്രസംഗത്തിൽ അണ്ണാമലൈ ആഞ്ഞടിച്ചു.

വികസനം, വിശ്വാസം, സുരക്ഷ എന്നീ വിഷയങ്ങളിൽ സെമിനാറുകളോടെയാണ് രാവിലെ പരിപാടികൾ ആരംഭിച്ചത്. ഈ സെമിനാറുകളിൽ സംഘപരിവാർ നേതാക്കൾ പങ്കെടുത്തു. ശബരിമല തന്ത്രിയും അദ്ദേഹത്തിന്റെ മകനും ചേർന്നാണ് സംഗമത്തിന് ദീപം തെളിയിച്ചത്.

ഉച്ചയ്ക്ക് ശേഷം നടന്ന ഭക്തജന സംഗമം തമിഴ്നാട് ബി.ജെ.പി. മുൻ അധ്യക്ഷൻ കെ. അണ്ണാമലൈ ഉദ്ഘാടനം ചെയ്തു. ബി.ജെ.പി. നേതാക്കളായ തേജസ്വി സൂര്യ ഉൾപ്പെടെയുള്ളവർ പരിപാടിയിൽ പങ്കെടുത്തു. വീരമണിയുടെ പ്രസിദ്ധമായ ഗാനം അദ്ദേഹത്തിന്റെ മകൻ വീരമണി കണ്ണൻ ആലപിച്ചു.