ഇന്ത്യയും പാകിസ്ഥാനും തമ്മിലുള്ള സംഘർഷം പരിഹരിച്ചത് താനാണെന്ന് ആവർത്തിച്ച് യു.എസ്. പ്രസിഡന്റ് ഡൊണാൾഡ് ട്രംപ്. വ്യാപാര സമ്മർദം ഉപയോഗിച്ച് ഏഴ് യുദ്ധങ്ങൾ അവസാനിപ്പിച്ച തനിക്ക് സമാധാനത്തിനുള്ള നോബൽ സമ്മാനത്തിന് അർഹതയുണ്ടെന്നും അദ്ദേഹം അവകാശപ്പെട്ടു. ശനിയാഴ്ച അമേരിക്കൻ കോർണർസ്റ്റോൺ ഇൻസ്റ്റിറ്റ്യൂട്ട് സ്ഥാപക അത്താഴ വിരുന്നിൽ സംസാരിക്കവെയാണ് ട്രംപിന്റെ പരാമർശം.

ആണവ ശക്തികളായ ഇന്ത്യയും പാകിസ്ഥാനും തമ്മിൽ സംഘർഷം തുടർന്നാൽ വ്യാപാരം അവസാനിപ്പിക്കുമെന്ന് താൻ പറഞ്ഞിരുന്നു. അതിനുശേഷമാണ് അവർ യുദ്ധം അവസാനിച്ചതെന്നാണ് ട്രംപിന്റെ അവകാശവാദം. നിലവിൽ ലോകവേദിയിൽ മറ്റ് രാജ്യങ്ങൾ അമേരിക്കയെ ബഹുമാനിക്കുന്നുണ്ടെന്നും അദ്ദേഹം കൂട്ടിച്ചേർത്തു.

റഷ്യയും യുക്രൈനും തമ്മിലുള്ള യുദ്ധവും അവസാനിപ്പിക്കുകയാണെങ്കിൽ തനിക്ക് നോബേൽ നൽകുമെന്ന് അറിയിച്ചതായും ട്രംപ്. കൂടാതെ തായ്‌ലൻഡ്, കംബോഡിയ, അർമേനിയ, അസർബൈജാൻ, കൊസോവോ, സെർബിയ, ഇസ്രായേൽ, ഇറാൻ, ഈജിപ്ത്, എത്യോപ്യ, റുവാണ്ട, കോംഗോ തുടങ്ങിയ രാജ്യങ്ങളിലെ സംഘർഷങ്ങൾ പരിഹരിക്കാനും താൻ സഹായിച്ചതായി അദ്ദേഹം അവകാശപ്പെട്ടു. വ്യാപാരം വഴിയുള്ള സമ്മർദ്ദം കാരണം നിർത്തിവച്ചവയാണ് ഈ സംഘർഷങ്ങളിൽ 60 ശതമാനമെന്നും കൂട്ടിച്ചേർത്തു.

എന്നാൽ ട്രംപിന്റെ ഈ അവകാശവാദങ്ങളെ ഇന്ത്യയും പാകിസ്ഥാനും ഇതിനോടകം തന്നെ നിഷേധിച്ചിട്ടുള്ളതാണ്. ഇരു രാജ്യങ്ങളിലെയും സൈനിക ഓപ്പറേഷൻസ് ഡയറക്ടർ ജനറൽമാർ തമ്മിൽ നേരിട്ട് നടത്തിയ ചർച്ചകളിലൂടെയാണ് വെടിനിർത്തൽ സാധ്യമായതെന്നാണ് ഈ രാജ്യങ്ങളുടെ നിലപാട്.

കൂടാതെ, ഓപ്പറേഷൻ സിന്ദൂർ സമയത്ത് പാകിസ്ഥാനുമായുള്ള സംഘർഷം അവസാനിപ്പിക്കാൻ മറ്റൊരു രാജ്യവും ഇടപെട്ടിട്ടില്ലെന്ന് പ്രധാനമന്ത്രി നരേന്ദ്ര മോദി പാർലമെന്റിൽ പറഞ്ഞിട്ടുണ്ട്. വിദേശകാര്യ മന്ത്രി എസ്. ജയശങ്കറും ഈ വിഷയത്തിൽ ഒരു മൂന്നാം കക്ഷിയുടെ ഇടപെടലും ഉണ്ടായിട്ടില്ലെന്ന് വ്യക്തമാക്കിയതാണ്.