വാഷിങ്ടൺ: എച്ച്-1ബി വിസകളുടെ ഫീസ് വർദ്ധിപ്പിച്ചുകൊണ്ടുള്ള യു.എസ്. പ്രസിഡന്റ് ഡൊണാൾഡ് ട്രംപിന്റെ ഉത്തരവ് ആശങ്കകൾക്ക് വഴിയൊരുക്കിയിരിക്കുകയാണ്. പുതിയ നിയമം അനുസരിച്ച്, ഒരു തൊഴിലാളിക്കുവേണ്ടി കമ്പനികൾ ഇനി മുതൽ 100,000 (ഏകദേശം 88 ലക്ഷം രൂപ) ഡോളർ ഫീസ് നൽകണം. എച്ച്-1ബി വിസ ഫീസ് കുത്തനെ വർദ്ധിപ്പിച്ച പുതിയ തീരുമാനം, ടെക് മേഖലയിലെ പ്രൊഫഷണലുകൾക്ക് തിരിച്ചടിയാകുമെന്നാണ് സൂചന. പ്രത്യേകിച്ച് ഇന്ത്യൻ പ്രൊഫഷണലുകളെയാണ് ഈ മാറ്റം ഏറ്റവും കൂടുതൽ ബാധിക്കുന്നത്.
കാരണം, അമേരിക്കൻ സാങ്കേതികവിദ്യാ മേഖലയിലെ ഉയർന്ന വൈദഗ്ധ്യമുള്ള തൊഴിലാളികളിൽ വലിയൊരു പങ്കും ഇന്ത്യക്കാരാണ്. പുതിയ ഫീസ് വർദ്ധനവ് കമ്പനികൾക്ക് വലിയ സാമ്പത്തിക ഭാരം ഉണ്ടാക്കുമെന്നും ഇത് വിദേശ തൊഴിലാളികളെ നിയമിക്കുന്നതിൽ നിന്ന് അവരെ പിന്തിരിപ്പിക്കുമെന്നും വിദഗ്ദ്ധർ ചൂണ്ടിക്കാട്ടുന്നു.
എന്നാൽ ഫീസുമായി ബന്ധപ്പെട്ട ആശങ്കകൾക്ക് അടിസ്ഥാനമില്ലെന്ന് അമേരിക്കൻ പ്രസ് സെക്രട്ടറി കരോലിൻ ലെവിറ്റ്. എച്ച്-1ബി വിസ ആരെയൊക്കെയാണ് ബാധിക്കുന്നതെന്നും ഏത് രീതിയിലാണ് ബാധിക്കുന്നതെന്നും അവർ വ്യക്തമാക്കി.
To be clear:
— Karoline Leavitt (@PressSec) September 20, 2025
1.) This is NOT an annual fee. It’s a one-time fee that applies only to the petition.
2.) Those who already hold H-1B visas and are currently outside of the country right now will NOT be charged $100,000 to re-enter.
H-1B visa holders can leave and re-enter the…
എച്ച്-1ബി വിസകളെക്കുറിച്ച് അറിഞ്ഞിരിക്കേണ്ട 5 കാര്യങ്ങൾ
1. പുതിയ എച്ച്-1ബി വിസകൾക്കുള്ള 100,000 ഡോളർ ഫീസ് എല്ലാ വർഷവും നൽകേണ്ടതില്ല. ഇതൊരു ഒറ്റത്തവണ ഫീസ് മാത്രമാണെന്ന് വൈറ്റ് ഹൗസ് പ്രസ് സെക്രട്ടറി കരോലിൻ ലീവിറ്റ് വ്യക്തമാക്കി. ഈ തുക പുതിയ വിസ അപേക്ഷകർക്ക് മാത്രമാണ് ബാധകം.
2. നിലവിൽ എച്ച്-1ബി വിസ കൈവശം വെച്ചിരിക്കുന്നവരെ ഈ പുതിയ നിയമം ബാധിക്കില്ല. അതായത്, വിസ പുതുക്കുന്നതിനോ വിദേശത്തുനിന്ന് അമേരിക്കയിലേക്ക് തിരികെ പ്രവേശിക്കുന്നതിനോ നിലവിലെ വിസ ഉടമകൾ 100,000 ഡോളർ ഫീസ് നൽകേണ്ടതില്ല. ഈ നിയമം പുതിയ അപേക്ഷകർക്ക് മാത്രമാണ് ബാധകം.
3. പുതിയ നിയമം നിലവിലുള്ള എച്ച്-1ബി വിസ ഉടമകളുടെ യാത്രാവകാശങ്ങളെ ബാധിക്കില്ലെന്ന് വൈറ്റ് ഹൗസ് പ്രസ് സെക്രട്ടറി കരോലിൻ ലീവിറ്റ് വ്യക്തമാക്കി. അവർക്ക് യു.എസിൽനിന്ന് പുറത്തുപോകാനും സാധാരണ നിലയിൽ തിരികെ പ്രവേശിക്കാനും സാധിക്കുമെന്ന് അവർ അറിയിച്ചു. പുതിയ പ്രഖ്യാപനം യാത്രാ ആനുകൂല്യങ്ങളിൽ ഒരു മാറ്റവും വരുത്തിയിട്ടില്ല.
4. പുതിയ എച്ച്-1ബി വിസകൾക്ക് മാത്രമാണ് ഈ ഫീസ് ബാധകമാവുകയുള്ളൂ. നിലവിൽ വിസയുള്ളവരെയോ വിസ പുതുക്കുന്നവരെയോ ഇത് ബാധിക്കില്ല.
5. അടുത്ത എച്ച്-1ബി ലോട്ടറി സൈക്കിൾ മുതൽ 100,000 ഡോളർ ഫീസ് പ്രാബല്യത്തിൽ വരുമെന്നും അധികൃതർ അറിയിച്ചു.
യു.എസ്. കമ്പനികൾക്ക് വിദേശത്തുനിന്നുള്ള വിദഗ്ദ്ധരായ തൊഴിലാളികളെ നിയമിക്കാൻ സഹായിക്കുന്നതാണ് എച്ച്-1ബി വിസ. ഇന്ത്യ, ചൈന, ദക്ഷിണ കൊറിയ തുടങ്ങിയ രാജ്യങ്ങളിൽനിന്നുള്ള വിദഗ്ധരെയാണ് ഈ മേഖല പ്രധാനമായും ആശ്രയിക്കുന്നത്. ഈ പുതിയ നിയമം പ്രാബല്യത്തിൽ വരുന്നതോടെ ആയിരക്കണക്കിന് ഇന്ത്യൻ പ്രൊഫഷണലുകളുടെ അമേരിക്കൻ തൊഴിൽ സ്വപ്നങ്ങൾക്ക് കനത്ത തിരിച്ചടിയാകുമെന്നാണ് വിലയിരുത്തൽ.
നിലവിൽ, എച്ച്-1ബി വിസ അപേക്ഷകരുടെ എണ്ണത്തിൽ ഇന്ത്യയാണ് മുൻപന്തിയിൽ. ഈ ഉയർന്ന ഫീസ് കാരണം കമ്പനികൾ വിദേശ തൊഴിലാളികളെ നിയമിക്കുന്നത് കുറയ്ക്കാൻ സാധ്യതയുണ്ടെന്ന് വ്യവസായ വിദഗ്ദ്ധരുടെ അഭിപ്രായം.