ഹൂസ്റ്റൺ: മലങ്കര സഭയിലെ 'അപ്രഖ്യാപിത പരിശുദ്ധൻ' എന്നറിയപ്പെടുന്ന പാമ്പാടി തിരുമേനിയുടെ ഐക്കൺ പ്രതിഷ്ഠ ഊർശ്ലേം അരമന ചാപ്പലിൽ നടക്കും. പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവായാണ് ചടങ്ങുകൾക്ക് മുഖ്യകാർമികത്വം വഹിക്കുന്നത്. സെപ്റ്റംബർ 20 ശനിയാഴ്ച രാവിലെ നടക്കുന്ന വിശുദ്ധ കുർബാനയ്ക്കും തുടർന്ന് നടക്കുന്ന പ്രതിഷ്ഠാ ചടങ്ങിനും പരിശുദ്ധ ബാവാ തിരുമേനി നേതൃത്വം നൽകും. മുൻ മുഖ്യമന്ത്രി ഉമ്മൻചാണ്ടിയുടെ മകനും പുതുപ്പള്ളി എം.എൽ.എയുമായ അഡ്വ. ചാണ്ടി ഉമ്മൻ മുഖ്യാതിഥിയായി ചടങ്ങിൽ പങ്കെടുക്കും.

ഗ്രീക്ക് ഓർത്തഡോക്സ് ഐക്കണോഗ്രാഫർ ഒഡീസ് ബിഫ്ഷയാണ് ഐക്കൺ രചിച്ചത്. കോട്ടയം ഭദ്രാസനാധിപൻ ഡോ. യൂഹാനോൻ മാർ ഡയസ്കോറോസ് മെത്രാപ്പോലീത്ത ഒരു പ്രത്യേക വീഡിയോ സന്ദേശത്തിൽ പാമ്പാടി തിരുമേനിയെ അനുസ്മരിച്ചു. സഭ ഔദ്യോഗികമായി വിശുദ്ധനായി പ്രഖ്യാപിച്ചിട്ടില്ലെങ്കിലും, ജനഹൃദയങ്ങളിൽ അദ്ദേഹം എന്നും ഒരു പുണ്യ പിതാവാണെന്ന് മെത്രാപ്പോലീത്ത പറഞ്ഞു.

പാമ്പാടി തിരുമേനിയുടെ പ്രാർത്ഥനാ ജീവിതവും അത്ഭുതങ്ങളും ലോകമെമ്പാടുമുള്ള ആളുകളിലേക്ക് എത്തിക്കുക എന്ന ലക്ഷ്യത്തോടെ പ്രവർത്തിക്കുന്ന പാമ്പാടി തിരുമേനി ഗ്ലോബൽ കമ്മ്യൂണിറ്റിയാണ് ഈ ചടങ്ങ് സംഘടിപ്പിക്കുന്നത്. ചടങ്ങുകളുടെ ഒരുക്കങ്ങൾ അമേരിക്കൻ സൗത്ത് വെസ്റ്റ് ഭദ്രാസനാധിപൻ അഭിവന്ദ്യ ഡോ. തോമസ് മാർ ഇവാനിയോസ് മെത്രാപ്പോലീത്തയും ഭദ്രാസന സെക്രട്ടറി റവ. ഫാ. ജോർജ്ജ് എസ്. മാത്യൂസും വിലയിരുത്തി. വൈദികരും വിശ്വാസികളും ശുശ്രൂഷകളിലും തുടർന്ന് നടക്കുന്ന സ്നേഹവിരുന്നിലും പങ്കുചേരും.