വാഷിങ്ടൺ: എച്ച്-വൺ ബി വിസയുടെ വാർഷിക ഫീസ് ഒരു ലക്ഷം ഡോളറാക്കി (ഏകദേശം 88,09,180 രൂപ) ഉയർത്തിക്കൊണ്ടുള്ള വിജ്ഞാപനത്തിൽ യു.എസ്. പ്രസിഡന്റ് ഡൊണാൾഡ് ട്രംപ് ഒപ്പുവച്ചു. ഉയർന്ന വിദ്യാഭ്യാസം, പരിശീലനം, വൈദഗ്ധ്യം എന്നിവ ആവശ്യമുള്ള മേഖലകളിൽ വിദേശികളായ പ്രൊഫഷണലുകളെ നിയമിക്കാൻ അമേരിക്കൻ കമ്പനികളെ അനുവദിക്കുന്നതാണ് എച്ച്-വൺ ബി വിസ.

ഉയർന്ന വൈദഗ്ധ്യമുള്ള ജോലികൾക്കായി ഏറ്റവും മികച്ച വിദേശ ഉദ്യോഗാർഥികളെ അമേരിക്കയിലേക്ക് കൊണ്ടുവരാനാണ് എച്ച്-1ബി വിസ നൽകുന്നതിലൂടെ ലക്ഷ്യമിടുന്നതെന്ന് പ്രസിഡന്റ് ഡൊണാൾഡ് ട്രംപ് പറഞ്ഞു. എന്നാൽ, നിലവിൽ വാർഷിക ശമ്പളം 60,000 ഡോളർ വരെ മാത്രം വാങ്ങുന്ന വിദേശ തൊഴിലാളികളെ എത്തിക്കാനുള്ള ഒരു മാർഗമായി ഇത് മാറിയെന്ന് അദ്ദേഹം ചൂണ്ടിക്കാട്ടി. സാങ്കേതികവിദ്യാ മേഖലയിലെ തൊഴിലാളികൾക്ക് സാധാരണയായി ലഭിക്കുന്ന ഒരു ലക്ഷം ഡോളറിന് മുകളിലുള്ള ശമ്പളത്തേക്കാൾ വളരെ കുറവാണിത്. സർക്കാർ തീരുമാനത്തെ ടെക് വ്യവസായം എതിർക്കില്ലെന്നും, അവർ ഈ നീക്കത്തിൽ സന്തുഷ്ടരായിരിക്കുമെന്നും ട്രംപ് കൂട്ടിച്ചേർത്തു.

പുതിയ മാറ്റങ്ങൾ പ്രധാനമായും ബാധിക്കാൻ പോകുന്നത് ടെക് മേഖലയിലെ ഉദ്യോഗാർഥികളെയാണ്, പ്രത്യേകിച്ചും ഇന്ത്യയിൽ നിന്നുള്ളവരെ. എച്ച്-1ബി വിസ അപേക്ഷകരുടെ എണ്ണത്തിൽ ഇന്ത്യയാണ് മുൻപന്തിയിൽ, തൊട്ടുപിന്നിൽ ചൈനയും കാനഡയുമുണ്ട്.ശാസ്ത്രം, സാങ്കേതികവിദ്യ, എൻജിനീയറിങ്, ഗണിതം തുടങ്ങിയ മേഖലകളിൽ ഉയർന്ന യോഗ്യതയുള്ള ആളുകൾക്ക് തൊഴിൽ നൽകുന്നതിനായി 1990-ലാണ് എച്ച്-1ബി വിസ പദ്ധതി ആരംഭിച്ചത്. എന്നാൽ, ഈ വിസ ദുരുപയോഗം ചെയ്ത് കുറഞ്ഞ വേതനത്തിൽ തൊഴിലാളികളെ നിയമിക്കാനും തൊഴിൽ സംരക്ഷണം സംബന്ധിച്ച നിയമങ്ങൾ ലംഘിക്കാനും പല കമ്പനികൾക്കും സാധിച്ചിരുന്നു.

എച്ച്-1ബി വിസ ഫീസ് സാധാരണയായി 2.5 ലക്ഷം മുതൽ 5 ലക്ഷം രൂപ വരെയായിരുന്നു. ഇതിൽ ഭൂരിഭാഗവും തൊഴിലുടമയാണ് അടച്ചിരുന്നത്.ഈ വർഷം ഏറ്റവും കൂടുതൽ എച്ച്-1ബി വിസകൾ നേടിയ കമ്പനി ആമസോണാണ്. അവർക്ക് 10,000-ത്തിലധികം വിസകൾ ലഭിച്ചു. ടാറ്റ കൺസൾട്ടൻസി, മൈക്രോസോഫ്റ്റ്, ആപ്പിൾ, ഗൂഗിൾ എന്നിവയാണ് തൊട്ടുപിന്നിലുള്ളത്. ഏറ്റവും കൂടുതൽ എച്ച്-1ബി തൊഴിലാളികളുള്ളത് കാലിഫോർണിയയിലാണ്.

യുഎസ് വാണിജ്യ സെക്രട്ടറി ഹോവാർഡ് ലുട്‌നിക് പറയുന്നതനുസരിച്ച്, എച്ച്-വൺ ബി വിസ ഫീസ് ഒരു ലക്ഷം ഡോളറാക്കി ഉയർത്തിയ തീരുമാനത്തെ എല്ലാ വൻകിട കമ്പനികളും പിന്തുണയ്ക്കുന്നുണ്ട്. യുഎസ് ബിരുദധാരികൾക്ക് തൊഴിലവസരങ്ങളിൽ മുൻഗണന നൽകുകയാണ് ഈ നയത്തിന്റെ പ്രധാന ലക്ഷ്യം.

"ആർക്കെങ്കിലും പരിശീലനം നൽകാൻ ഉദ്ദേശിക്കുന്നുണ്ടെങ്കിൽ, അത് നമ്മുടെ മികച്ച സർവ്വകലാശാലകളിൽ നിന്ന് പഠിച്ചിറങ്ങിയ അമേരിക്കക്കാർക്ക് നൽകുക. നമ്മുടെ ജോലികൾ തട്ടിയെടുക്കാൻ പുറത്തുനിന്നുള്ളവരെ കൊണ്ടുവരുന്നത് അവസാനിപ്പിക്കുക," ലുട്‌നിക് പറഞ്ഞു.

മുൻപ്, കമ്പനിയുടെ വലിപ്പം അനുസരിച്ച് ഒരു എച്ച്-വൺ ബി വിസയ്ക്ക് ഏകദേശം 1700 ഡോളർ മുതൽ 4500 ഡോളർ വരെയായിരുന്നു ചെലവ്. ഇതിൽ രജിസ്‌ട്രേഷൻ ഫീസ്, ഫയലിങ് ഫീസ്, ഫ്രോഡ് പ്രിവൻഷൻ ഫീസ്, ആക്റ്റ് ഫീസ് തുടങ്ങിയവ ഉൾപ്പെട്ടിരുന്നു. 50-ൽ കൂടുതൽ തൊഴിലാളികളുള്ള കമ്പനികൾ 4000 ഡോളർ അധികമായി നൽകണം. കൂടാതെ, വേഗത്തിലുള്ള പ്രോസസിങ്ങിന് 2500 ഡോളർ വരെ പ്രീമിയം ഫീസും നൽകേണ്ടി വന്നിരുന്നു.

എച്ച്-വൺ ബി വിസ ഫീസ് വർദ്ധിപ്പിച്ചതിന് പുറമെ, 10 ലക്ഷം ഡോളർ നൽകുന്നവർക്ക് അതിവേഗ 'ഗോൾഡ് കാർഡ്' വിസകൾ നൽകുന്ന ഉത്തരവിലും ട്രംപ് ഒപ്പുവച്ചു. ഫെബ്രുവരിയിൽ ട്രംപ് പ്രഖ്യാപിച്ച ഈ പദ്ധതി പ്രകാരം, കുറഞ്ഞത് 10 ലക്ഷം ഡോളർ നിക്ഷേപിക്കുന്ന അമേരിക്കക്കാരല്ലാത്തവർക്ക് കുടിയേറ്റ വിസയ്ക്ക് അർഹത ലഭിക്കും. 20 ലക്ഷം ഡോളർ നൽകുകയാണെങ്കിൽ കമ്പനികൾക്ക് ഗോൾഡ് കാർഡുകൾ സ്പോൺസർ ചെയ്യാനും സാധിക്കും.

ഏകദേശം 80,000 ഗോൾഡ് കാർഡുകൾ ലഭ്യമാക്കുമെന്ന് യുഎസ് വാണിജ്യ സെക്രട്ടറി ഹോവാർഡ് ലുട്‌നിക് അറിയിച്ചു. ഗോൾഡ് കാർഡ് അംഗീകാരം ലഭിച്ച് 15,000 ഡോളർ 'പരിശോധനാ ഫീസ്' അടയ്ക്കുന്നവരെ ഗ്രീൻ കാർഡ് ഉടമകളായ സ്ഥിരതാമസക്കാരായി കണക്കാക്കും. നിലവിലുള്ള EB-1, EB-2 വിസ പ്രോഗ്രാമുകൾക്ക് പകരമായിരിക്കും ഈ പുതിയ ഗോൾഡ് കാർഡ് എന്നും അദ്ദേഹം കൂട്ടിച്ചേർത്തു.